Најголема и најбрза акција досега

УНИЦЕФ ќе испорача две милијарди вакцини во 92 држави

УНИЦЕФ контактира со 350 партнери, вклучувајќи ги водечките светски авио и бродски компании, логистички асоцијации, за, кога ќе бидат спремни за пазарот, што побрзо испорача две милијарди вакцини против коронавирусот во 92 држави.

EPA-EFE

Директорката на одделот за испорака на производи во УНИЦЕФ Етлева Кадили кажа дека од големо значење е партнерството со бројни компании.

„Додека се работи на финиширањето на вакцината против коронавирусот, УНИЦЕФ се здружува со авио-компании, бродски компании, сите оние кои можат да ни помогнат да ги испорачаме вакцините“, кажа таа.

За да ги почне подготовките за испорака на вакцините, УНИЦЕФ ги информирал водечките авио-компании за начинот на кој ќе се испорачаат околу две милијарди дози вакцини за вирусот следната година.

Освен вакцините, со бродови ќе бидат транспортирани и милијарда шприцеви.

Набавката, испораката и дистрибуцијата на вакцините против коронавирусот ќе биде најголемата и најбрза акција која УНИЦЕФ ја извел.