Унгарија поради скапата енергија ги затвора стадионите, библиотеките, театрите, базените

Драстичниот раст на цените на енергенсите ја присили Унгарија на затворање на библиотеките, театрите, базените и своите нови стадиони во текот на зимата, јавува Франс прес. Новите стадиони, симболите на моќта на десничарскиот премиер Виктор Орбан кој е на власт 12 години, се последните на долгата низа градби кои повеќе не можат да се носат со растечките цени на енергенсите.

EPA-EFE

Секешфехервар, еден од најбогатите градови во Унгарија, со кој управуваат членови на партијата на Орбан, е еден од многуте кои ги затвораат своите музеи, библиотеки и театри преку зимата. Градоначалникот Андрас Чер Палковиќ најави дека и новиот стадион, кој може да прими 14.000 гледачи, овој месец ќе биде затворен поради штедењето.

„Јавните простори се она што го прави градот. Никој не е среќен поради овие мерки, но луѓето прифаќаат дека се потребни“, кажа за Франс прес Чер Палковиќ, член на владејачката партија Фидес.