Турција ја обвини Европа за плашење на муслиманите: Тоа им се правеше на Евреите во 20 век

Функционер на турското претседателство денес кажа дека „навредливите карикатури“ на пророкот Мухамед се користат за заплашување на муслиманите во Европа под изговор на слобода на говорот, додека растат тензиите меѓу Анкара и Париз.

EPA-EFE

Портапролот на турското претседателство Фахретин Алтун ја обвини Европа за демонизација на муслиманите, „како што тоа им се правеше на Евреите во дваесеттите години од минатиот век“.

„Подмолната политика на навредливите карикатури, обвинувањата според кои муслиманите се одговорни за сепаратизам и претресите на џамиите немаат врска со слободата на говорот“, напиша тој на Твитер на англиски јазик.

„Тука станува збор за заплашување на муслиманите и нивно потсетување дека се добредојдени кога придонесуваат на економијата на Европа, но дека истовремено никогаш нема да станат нејзин составен дел“, додаде тој.

Кажа и дека таквиот став кон муслиманите е „многу познат“ од претходно и дека потсетува на „демонизацијата на европските Евреи во дваесеттите години од минатиот век“.

Неговата изјава следи откако Франција го повика на консултации својот амбасадор во Турција, по многу острите коментари на турскиот претседател Реџеп Таип Ердоган во саботата на сметка на францускиот претседател Емануел Макрон, поради аферата со карикатурите на Мухамед.

Ердоган го доведе во прашање „менталното здравје“ на францускиот претседател и му советуваше да почне да се лекува.

Искажувајќи му почит на Самуел Пати, на кого муслимански напаѓач му ја отсече главата откако на своите ученици им ги покажувал карикатурите на Мухамед на час по слобода на говорот, Макрон кажа дека не намерава да се „откаже од карикатурите“.

„Некои европски лидери денес не ги целат само муслиманите. Тие ги напаѓаат и нашите вредности и нашите свети текстови, нашиот пророк и нашите политички лидери, всушност, нашиот начин на живот“, додаде Алтун.

Истакна дека Европејците досега морале да сфатат дека „муслиманите нема да заминат бидејќи не нѐ сакате. Нема да го свртиме и другиот образ кога нѐ навредувате, туку по секоја цена ќе се браниме себеси и она што е наше“.

Францускиот државен секретар за еврпски прашања Клемен Бон денес во изјава ја осуди „желбата на турскиот претседател Реџеп Ердоган за дестабилизација“. Кажа дека Ердоган „се претставува како заштитник на муслиманите на целосно инструментализиран начин“.

Бон ја повика јавноста да не биде наивна кога станува збор за Турција, онака како што „Европа беше наивна во последните 15 години“.

Тој смета дека „не е случајно тоа што по валканиот напад на наставникот среде Париз на 16 октомври поради покажувањето на карикатурите на Мухамед не следела официјална осуда од Анкара“.

Бон верува дека Ердоган сака „да го искористи тој драматичен настан за да го истакне следното: Франција се бори против муслиманите, а сѐ за луѓето да ги поистоветат исламот и исламизмот“.

Додаде дека смета дека Ердоган се труди „да ја задржи деструктивната двосмисленост, со намера луѓето да го измешаат поимот на борбата против исламизмот која неуморно ја водиме со наводната борба против исламот и муслиманите, која воопшто не постои“.

Легенда под Главна слика

EPA-EFE

Ако имаме предвид дека секој збор има свое значење, тогаш оваа „железна завеса" кон Бугарија, за која зборува премиерот дека била подигната од Југославија, се доведува во корелација со Берлинскиот ѕид. А, железната завеса помеѓу двете германии доведе до нивно обединување.

повеќе

Јас, Ангела Илиевска , учесник во повеќе протестни движења низ годините наназад, со себе го носам товарот на мојата личност и идеалите кои ги застапувам низ сите тие движења.

повеќе

Германија не го негира своетo фашистичко минато, ниту дека ја окупирала Франција, па следствено, не се ни менувани ни учебниците во обете земји, ниту се бришани делови од споменични натписи.

повеќе