Северен тек 1 може да е неповратно уништен, смета извор од германската влада (ВИДЕО)

Сè поголеми се стравувањата дека гасоводот Северен тек 1, кој се протега од Русија до Германија, би можел да биде трајно неупотреблив по големото оштетување на тој гасовод на дното на Балтичкото Море.

EPA-EFE

Ако истекувањето на гасот на двете линии на гасоводот не биде брзо поправено, големите количества морска вода кои влегуваат во цевките ќе предизвикаат корозија, изјави извор од германската влада за весникот Тагесшпил.

Сеизмолозите вчера пријавија дека регистрирале повеќе експлозии во Балтичкото Море, по кои беше откриено истекување гас од гасоводите Северен тек 1 и 2. Истекување е пријавено на три места во цевките кои се полни со природен гас.

Иако руски гас по гасоводите Северен тек во моментов не ѝ се испорачува на Европа, значителното оштетување на гасоводот значи дека оваа зима по него веројатно нема да потече гас кон Европа, дури и ако за тоа има политичка волја, наведуваат аналитичарите.