Русија праќа воени бродови во Црно Море, ќе изврши над 4.000 вежби

Руското Министерство за одбрана денеска објави дека испраќа повеќе од 10 воени брода, вклучително и чамци, од Касписко во Црно Море за да учествуваат во воени вежби, објави Интерфакс.

Фото: ЕПА

Западот и Украина изразија загриженост поради трупањето на руските воени сили во Украина.

Москва тврди дека воените сили ќе останат таму сѐ додека смета дека е потребно и дека не се закана.

Во вторникот таа објави дека почнува планирана проверка на борбената готовност на нејзините сили, која ќе вклучува повеќе од 4.000 вежби овој месец.

„Како дел од зимската обука, повеќе од 10 амфибиски и артилериски бродови и бродови од јужното воено крило спроведуваат меѓуфлотен премин од Касписко кон Црно Море“, соопшти руското министерство, додавајќи дека бродовите ќе учествуваат во воени вежби.

Руската Црноморска флота е со седиште во Крим, кој Русија го анектираше од Украина во 2014 година.