„Се разбира, ја поздравуваме таквата политичка волја, но со оглед на де факто и де јуре ситуацијата што сега ја имаме на украинската страна, такви платформи не може да се бараат“, рече портпаролот на Кремљ, Дмитриј Песков.
Папата Франциско пред 10 дена во интервју за италијанскиот дневник Ла Стампа повтори дека Ватикан е подготвен да направи сѐ за да посредува и да стави крај на конфликтот меѓу Русија и Украина. Откако Русија ја нападна Украина пред повеќе од девет месеци, неколку држави, вклучувајќи ги Турција, Израел и Кина, се понудија да бидат потенцијални посредници во конфликтот.
Русија ја обвини Украина дека ги оневозможува преговорите со исклучување на ангажманот на претседателот Владимир Путин, а Киев се спротивставува на идејата за отстапување на која било заземена територија во она што Западот и Украина го гледаат како грабеж на земјиште во империјален стил.
Папата Франциско често ја споменува Украина во своите јавни обраќања и неколку пати предупреди дека кризата се заканува со употреба на нуклеарно оружје со глобални последици, кои нема да можат да се контролираат. Минатиот месец, тој за прв пат директно го молеше Путин да ја запре „спиралата на насилство и смрт“ во Украина.
