Русија бара состанок на Советот за безбедност на ОН поради нападот врз Црноморската флота

Русија побара Советот за безбедност на Обединетите нации да одржи состанок в понеделник, на 31 октомври, на кој ќе се разговара за нападот врз бродовите на Црноморската флота во Севастопол, соопшти денеска заменик-постојаниот претставник на Русија во ОН Дмитриј Полјански.

Фото: ЕПА

Москва ја обвинува Украина за нападот, а Полјански рече дека Русија официјално го известила генералниот секретар на ОН дека по нападот го суспендира учеството во спроведувањето на договорот за транспорт на украинско жито од пристаништата на Црно Море, пренесува Тасс.

Полјански изјави дека бродовите на Црноморската флота во Севастопол ја осигуруваат безбедноста на бродовите што превезуваат украинско жито во согласност со Црноморската иницијатива.

Брод на руската црноморска флота беше оштетен во Севастопол за време на напад со беспилотно летало на полуостровот Крим, кој е анектиран од Русија.