„Никогаш од иницирањето на годишниот извештај на Репортери без граници во 1995 година бројот на затворени новинари не бил толку висок“, се вели во соопштението на невладината организација, која ја брани слободата на медиумите.
Тоа е зголемување од 20 отсто во однос на претходната година, се вели во годишниот извештај на организацијата.
Според РСФ, на 1 декември вкупно 488 медиумски работници биле во затвор само затоа што си ја вршеле својата работа.
„Ова извонредно зголемување на произволното притворање во голема мера може да се припише на три земји чии влади се рамнодушни кон копнежот на нивните граѓани за демократија“, се вели во извештајот.
Во Мјанмар, каде војската ја презеде власта со државен удар на 1 февруари 2021 година, 53 новинари моментално се во затвор. Пред една година имало само двајца.
Во Белорусија, каде што претседателот Александар Лукашенко победи на контроверзните реизбори во август 2020 година, 32 новинари сега се зад решетки, за разлика од седуммина пред една година.
Зголемената контрола на Кина врз Хонг Конг, исто така, ја влоши ситуацијата: таму, законот за национална безбедност се користи како изговор за притвор на најмалку 10 новинари.
Пред тоа, Хонг Конг, благодарение на својот посебен статус, беше регионален модел за почитување на слободата на медиумите.
Од друга страна, минатата година биле убиени 46 новинари, што е најмалку во последните дваесет години.
„Овој тренд на опаѓање, кој е нагласен од 2016 година, може да се припише првенствено на развојот на регионалните конфликти (Сирија, Ирак, Јемен) и стабилизацијата на боиштата по 2012 и 2016 година, кои беа особено смртоносни“, велат од РСФ.
Повеќето од убиените не настрадале во судирите, туку биле „ таргетирани и елиминирани“, додава организацијата.
Мексико и Авганистан повторно се двете најопасни земји за новинарите оваа година, со седум, односно шест убиени, а потоа следат Јемен и Индија.
