Прошталниот говор на Ангела Меркел: „Ни треба силен отпор кон теориите на заговор“ (ВИДЕО)

Германската војска со традиционална парада синоќа се прости од германската канцеларка Ангела Меркел, која за една недела, по 16 години на власт, заминува во политичката историја.

EPA-EFE

Свеченоста, чии корени досегаат до 16 век, е најголемата чест која германските оружени сили можат да му ја дадат на некој цивил. Меркел им се заблагодари на соработниците и семејството, а на својот наследник Олаф Шолц му посака среќа.

„16 години на местото канцеларка беа исполнети со бројни настани, а често и предизвици. Тие години за мене беа предизвик и во политичка и во човечка смисла. Но, тоа беше време кое ме исполни“, кажа Меркел во краткиот проштален говор.

Таа ги спомна и антинаучните сегменти во општеството и сè поприсутните теории на заговор.

„Нашата демократија зависи од нашата способност за критички дискурс и самоуправување. Зависи од разговорот за интересите и меѓусебното уважување. Зависи од солидарноста и довербата, особено довербата во фактите. И секаде каде научните факти се негираат и се шират кампањи на омраза и теории на заговор, отпорот мора да биде гласен и силен“, порача Меркел.

Како најголеми предизвици ги наведе финансиската криза во 2008 и бегалската во 2015.

„Тогаш сфатив колку се важни меѓународните институции и мултилатералните инструменти. Бидејќи кризите не познаваат граници“, кажа таа.

Германската војска или Бундесвер со специјална свеченост која вклучува парада, музика и факели се простува од германските претседатели, канцелари и министри за одбрана.

Традицијата е лицето во чија чест се одржува да избере три песни кои ги изведува воениот оркестар. Меркел се одлучи за црковната "Grosser Gott, wir loben dich", евергрин на познатата германска повоена пејачка Холдегард Кнеф и песната на источногерманската панк икона Нина Хаген "Du hast den Farbfilm vergessen" (Го заборави филмот во боја). Таа песна била голем хит во 1974, кога Меркел студирала физика во Лајпциг, во тогашна Источна Германија.

Меркел официјално на својот наследник Шолц треба да му ја предаде власта следната недела кога новиот состав на Бундестагот треба да избере нов канцелар.

Легенда под Главна слика

EPA-EFE

Јазикот е многу повеќе од структура на една реченица или граматика, јазикот е нашата историја, нашите обичаи и нашето наследство...

повеќе

Овој отпад, освен тоа што ја загадува животната средина, исто така предизвикува дефекти во машините, ги оштетува контејнерите и го спречува транспортот на друг отпад.

повеќе

Нема простор за двоумење и губење време, затоа Македонија и Бугарија треба да соработуваат што е можно поскоро за да најдат јасен јазик за разбирање, во процес кој би бил следен од ЕУ, Вашингтон и ОН.

повеќе