Орбан: „Имам само лоши вести“, болниците ќе се соочат со најтешкиот период досега (ВИДЕО)

Унгарија влегува во најтешкиот период од почетокот на пандемијата на коронавирусот и во текот на следните две недели болниците ќе бидат под притисок како никогаш порано, рече во четвртокот премиерот Виктор Орбан.

Фото: ЕПА

„Имам само лоши вести“, рече Орбан преку видео-порака објавена на Фејсбук. „Пред нас се најтешките две недели од почетокот на пандемијата. Бројот на инфекции нагло се зголемува и ќе продолжи да расте како резултат на новите мутации“, пренесе Ројтерс.

Во четвртокот, Унгарија пријави 4.385 нови инфекции, што е најголем број оваа година.

Владата на Унгарија ја продолжи делумната блокада до 15 март, изјави шефот на кабинетот на Орбан претходно во четвртокот.

Следните две недели ќе бидат „исклучително тешки“, рече Гергеј Гујаш на владиниот брифинг, додавајќи дека темпото на вакцинирање ќе се забрза откако Унгарија во средата започна да вакцинира со кинеската вакцина Синофарм.

Тој рече дека се очекува Орбан да прими вакцина од Синофарм следната недела.

Унгарија, со околу 10 милиони жители, од почетокот на пандемијата пријави 414.514 случаи, со 14.672 смртни случаи.

Досега, нешто повеќе од половина милион луѓе примиле барем една доза вакцина.

Сите средни училишта се затворени од 11 ноември, како и хотелите и рестораните, освен за храна за носење, воспоставен е полициски час по 19 часот и сите собири се забранети.

Унгарија во средата стана првата земја во Европската унија што започна да инокулира луѓе со вакцини од Синофарм, откако ја најави руската Спутник V како дел од кампањата за вакцинација. Кинеските и руските вакцини не добиле регулаторно одобрување во ЕУ.

Овие вакцини сега се администрираат заедно со Фајзер-Бајонтек, вакцината развиена од американската компанија Модерна и англо-шведската фирма Астра зенека.

Според заводот за статистика, постои зголемена подготвеност за вакцинирање, при што 40% во средината на февруари рекле дека планираат да се вакцинираат, а 26% рекле можеби.

Легенда под Главна слика

Фото: ЕПА