Климатската активистка Грета Тунберг рече дека досегашниот самит на ОН за климата КОП26 во Глазгов бил неуспешен и ги обвини лидерите дека постојано наоѓаат дупки во правилата, оправдувајќи ги емисиите на штетни гасови во своите земји.
Говорејќи на протестот во главниот град на Шкотска, Тунберг повика на „итни и драстични“ правила за борба против загадувачите наместо, како што ги нарече, „далечни, необврзувачки ветувања“.
„Светските лидери очигледно се плашат од вистината, но колку и да се трудат, не можат да ја избегнат“, рече таа.
Тунберг рече: „Не е тајна дека КОП26 е неуспех. Треба да биде очигледно дека не можеме да ја решиме кризата со истите методи што и нè воведоа во неа“.
Таа рече: „Потребни ни се итни драстични годишни намалувања на емисиите, за разлика од она што светот досега го виде.“
„Луѓето на власт можат да продолжат да живеат во својот балон исполнет со нивните фантазии, како вечен раст на една ограничена планета и технолошки решенија што наеднаш ќе се појават навидум од никаде и едноставно ќе ги избришат сите овие кризи.“
„Сето ова додека светот буквално гори, запален, и додека луѓето што живеат на првите борбени линии сè уште го носат товарот од климатската криза.“
Таа го опиша самитот на ОН за климатски промени како „двонеделна прослава на вообичаениот бизнис и бла, бла, бла“ за „да се одржи вообичаениот бизнис“ и „да се создадат дупки за да имаат корист тие самите“.
Тунберг додаде: „Знаеме дека нашите цареви се голи“.
Активисти од неколку други земји, исто така, одржаа говори за тоа како климатските промени веќе влијаат на нивните татковини.
Маршот беше организиран од движењето „Петоци за иднината Шкотска“, група финансирана од млади луѓе инспирирани од Тунберг.
Ова беа едни од најголемите демонстрации што се одржаа во текот на самитот, кој се одржува во Глазгов.
Целта на КОП26 е да обезбеди доволен број земји да се обврзат на намалени емисии за да го ограничат порастот на просечните глобални температури на 1,5 Целзиусов степен.
Научниците велат дека има сѐ помалку шанси да се постигне таа цел.
Светот веќе се загреа за повеќе од 1,1 степен, а сегашните проекции врз основа на планираните намалувања на емисиите во следната деценија покажуваат дека глобалното затоплување до 2100 година ќе достигне 2,7 Целзиусови степени.
