Грчки суд пресуди дека Златна зора е криминална организација

Грчки суд денеска донесе одлука дека екстремно десничарската партија Златна зора работела како криминална организација, донесувајќи значајна пресуда за виновност во маратонското петгодишно судење.

Судот пресуди дека седум поранешни пратеници на партијата, вклучително и лидерот на партијата, Никос Михалолијакос, се виновни за водење криминална организација, додека другите се виновни за учество во криминална организација.

Додека беше соопштувана пресудата, почнаа тепачки во дел од антифашистичкиот митинг на кој присуствуваа повеќе од 15.000 луѓе пред судската зграда. Мала група фрлаше проектили додека полицијата одговори со солзавец и водени топови.

Меѓу 68-те обвинети во судскиот процес се и 18 поранешни пратеници од партијата, која беше основана во 80-тите години на минатиот век како неонацистичка организација и стана трета најголема партија на Грција во парламентот за време на децениската финансиска криза во земјата.

Судот разгледуваше четири случаи слеани во еден: фаталното прободување на грчкиот рап-пејач Павлос Фисас со нож, напади врз рибари-мигранти, напади врз левичарски активисти и дали Златна зора функционира како криминална организација.

Судијата претседавач на тричлениот совет почна да ги чита пресудите нешто по 11:30 часот, пресудувајќи дека е виновен Јоргос Рупакијас за убиството на Фисас. Тоа предизвика аплауз внатре во судницата и меѓу толпата надвор. Рупакиjас беше обвинет дека е партиски поддржувач што му ги нанел фаталните убодни рани на Фисас.

Лидерот на партијата Михалолијакос и уште 17 поранешни членови на парламентот се соочуваат со најмалку 10 години затвор за обвиненија за водење или учество во криминална организација. Десетиците други на кои им се суди, членови на партијата и наводни соработници, се соочуваат со осуди за обвиненија што се движат од убиство до лажно сведочење - повеќето поврзани со бран насилни напади во 2013 година.

Само 11 од 68 обвинети беа присутни во судницата, а останатите ги застапуваа нивните адвокати. Ниту еден од поранешните пратеници на Златна зора не беше во судот.

Безбедноста е зајакната, распоредени се околу 2.000 полицајци, како и дрон и полициски хеликоптер. Авенијата пред судот во Атина е затворена за сообраќај, а самата зграда е блокирана од низа полициски автобуси.

Повеќе од 10.000 луѓе, меѓу кои и политичари од сите политички партии, се собраа пред судската зграда. Толпата мавташе со транспаренти со пароли како „Фисас е жив, здробете ги нацистите“ и извикуваше „Народот бара нацистите да одат во затвор“.

Претставници на партии од целиот политички спектар, од владејачката конзервативна партија Неа демократиа до грчката Комунистичка партија, беа пред судницата.

Во јадрото на случајот беше дали низата насилни напади може да се поврзат со раководството на Златна зора и дали партијата работи како криминална организација. Прелиминарната истрага покажа дека партијата дејствувала како паравоена група, со наредби предавани од раководството на партијата до соседните организации и до групите што вршеле напади врз мигранти, што честопати доведувало до сериозни повреди.

Но во текот на судењето, обвинителот препорача ослободување од обвиненијата за злосторничка организација за многу партиски членови врз основа на недостиг од докази.

Групата за човекови права Амнести интернешнел, која учествуваше и помогна во организирањето мрежа за евидентирање на расистичкото насилство во Грција, рече дека денешната пресуда ќе ги зајакне напорите на оние што се обидуваат да ги казнат кривичните дела од омраза.

„Обвинувањата против лидерите и членовите на Златна зора, вклучително и за убиството на Павлос Фисас, разоткриваат една пукнатина што постои не само во Грција, туку и низ цела Европа и пошироко“, рече Нилс Муижниекс, директор за Европа во Амнести. „Влијанието на оваа пресуда, во ова пресвртно судење на една екстремно десничарска партија со агресивен став против мигрантите и античовековите права, ќе се почувствува далеку од границите на Грција.“

Златна зора негира каква било директна врска со нападите и ги опиша судењето и обвиненијата покренати против раководството на партијата како „невиден заговор“ насочен кон спречување на порастот на нејзината популарност.

„Сите приврзаници чекаат утре ослободителна пресуда, одлука што ќе предизвика уште поостра националистичка кампања за да си ја вратиме нашата земја“, рекоа тие вчера.

Каракачанов: На Бугаринот паметот му доаѓа следниот ден...

повеќе

При еден спор, понижувањето не е добро ниту за победникот, ниту за поразениот; ниту за „победникот“, ниту за „поразениот“.

повеќе

Стравот од неизвесноста што ја носи пандемијата од ковид-19 вирусот, бара да се преструктуираме и да го промениме начинот на нашето однесување и работење.

повеќе