ЕУ размислува да донира пет проценти од обезбедената вакцина против корона за сиромашните

Европската унија размислува да донира пет проценти од својата сегашна количина на вакцини против ковид-19 за сиромашните земји, објави во понеделникот Ројтерс повикувајќи се на интерен документ.

EPA-EFE/ANDREW LICHTENSTEIN

Агенцијата додава дека се работи за потег што може да го наруши планот за дистрибуција на вакцини на Светската здравствена организација (СЗО).

Планот, изработен од француската влада, за прв пат јасно зборува за европска донација на вакцини, што досега се сметало само како опција доколку европскиот блок на крај има вишок дози.

Доколку се реализира, планот ќе нанесе удар врз глобалната иницијатива за купување и дистрибуција на вакцини, позната како Ковакс, што се спроведува во соработка со СЗО.

Глобалната иницијатива Ковакс, која заедно ја започнаа СЗО и Алијансата за вакцини (ГАВИ), ја надмина зададената цел во средината на ноември за собирање на повеќе од 2 милијарди долари за купување и дистрибуција на вакцини против ковид-19 на сиромашните земји, но предупреди дека сè уште ѝ недостигаат средства.

Ковакс има за цел да испорача две милијарди дози до крајот на следната година на најмалку 20 проценти од луѓето ширум светот на кои им е најпотребна помош.

Според францускиот план, кој треба да го одобрат другите членки на ЕУ, ЕУ може да им донира на сиромашните земји до 65 милиони дози вакцини.

Тоа би биле пет проценти од 1,3 милијарди дози што ЕУ досега ги обезбеди преку договори за набавка со шест компании. Тоа се Фајзер/Бајонтек, Модерна, Џонсон и Џонсон, Астра Зенека/Оксфорд, Санофи/ГСК и Кјурвак.

Со цел да се намалат трошоците, вакцините би се доставувале директно од производителите кои имаат договори со Унијата.

Во документот се наведува дека ова би бил најефективниот начин да се постигне амбициозниот план за вакцината како јавно добро.

Со донираната вакцина би можеле да се вакцинираат 16 милиони здравствени работници во 62 сиромашни земји, а од донациите корист може да имаат лекарите и медицинските сестри во останатите 54 земји со ниски примања.

Ковакс тешко доаѓа до нарачка за вакцини затоа што богатите земји резервираа поголем дел од достапните количини, вклучително и земјите од ЕУ кои и покрај тоа што учествуваат во финансирањето на СЗО, избегнуваат да купуваат вакцини преку таа организација на ООН затоа што не сакаат количините да им бидат ограничени на 20 проценти од нивната популација.

Европската унија, која има 450 милиони жители, се очекува во наредните месеци да прими не повеќе од 280 милиони дози од вакцините Фајзер/Бајонтек и Модерна, по одобрението од Европската агенција за лекови.

Членките на ЕУ веројатно нема да донираат дел од своите почетни ограничени залихи.

СЗО, чии претставници се критични настроени кон францускиот план, ќе расправаат за тој документ денес.

Легенда под Главна слика

EPA-EFE/ANDREW LICHTENSTEIN

Формирањето на платформа за прекугранична соработка за борба против аерозагадувањето има потенцијал вистински да придонесе за намалување на загадувањето на воздухот во нашата земја.

повеќе

 Еврообврзница во услови на најголемата светска економска криза за репрограмирање на долгот и буџетска поддршка.

повеќе

Повикот на Заев за „Влада за национален спас“ само три дена откако неговиот кабинет ја доби собраниската доверба, покажува дека таа тешко би се качила над сегашните 62 пратеници.

повеќе