И покрај климатскиот самит

Светот оди кон катастрофално загревање од 2,4 Целзиусови степени

И покрај ветувањата дадени на климатскиот самит КОП26, светот сè уште не е ни блиску до неговите цели за ограничување на порастот на глобалната температура, покажува нова анализа.

Фото: ЕПА

Таа пресметува дека светот се движи кон загревање од 2,4 Целзиусови степени, што е многу повеќе од ограничувањето од 1,5 степени на кое се обврзаа нациите.

КОП26 „има огромен јаз во кредибилитетот, акцијата и посветеноста“, според Следачот на климатските акции (КАТ), пренесува Би-би-си.

Самитот во Глазгов се смета за клучен за сузбивање на климатските промени.

Но предвидувањето е во спротивност со оптимизмот на состанокот на ОН минатата недела, по серијата големи најави, кои содржеа и ветување дека ќе се запре уништувањето на шумите.

КОП26 се очекува да заврши оваа недела.

Проекцијата доаѓа во моментот кога Метеоролошката канцеларија на Обединетото Кралство предупреди дека милијарда луѓе би можеле да бидат погодени од фатална топлина и влажност доколку глобалната просечна температура се зголеми за 2 Целзиусови степени над прединдустриските нивоа.

Извештајот на КАТ ги разгледува ветувањата дадени од владите пред и за време на КОП26.

Се заклучува дека, во 2030 година, емисиите на стакленички гасови што ја загреваат планетата сепак ќе бидат двојно повисоки од потребните за одржување на порастот на температурата под 1,5 Целзиусови степени.

Научниците велат дека ограничувањето на загревањето на 1,5 Целзиусови степени ќе спречи да се случат најопасните влијанија од климатските промени.

На самитот КОП одржан во Париз во 2015 година беше изложен план за избегнување на опасните климатски промени, кој вклучуваше „стремеж кон напори“ загревањето да се задржи на под 1,5 Целзиусови степени.

Но кога ќе се анализираат реалните политики на владите – а не ветувањата – предвиденото загревање на светот ќе биде 2,7 Целзиусови степени до 2100 година, сугерира КАТ. Следачот е поддржан од голем број организации, вклучувајќи го и престижниот Потсдам институт за истражување на климатските влијанија во Германија.

„Оваа нова пресметка е како телескоп обучуван на астероид што се движи кон Земјата. Тоа е поразителен извештај, кој во секој здрав свет би ги натерал владите во Глазгов веднаш да ги остават настрана своите разлики и да работат со бескомпромисна сила за договор за спас на нашата заедничка иднина“, изјави извршната директорка на Гринпис интернешнел Џенифер Морган.

Сепак, шансите на светот се подобрија по климатскиот самит во Париз во 2015 година, кога Следачот на климатските акции процени дека политиките ја водат планетата кон загревање за 3,6 Целзиусови степени.

Следачот на климатските акции го обвинува „застоениот импулс“ на владите за ограничениот напредок кон намалување на емисиите на стакленички гасови до 2030 година.

Се вели дека новите ветувања на САД и Кина за постигнување на нето нула благо ги подобриле неговите прогнози за пораст на температурата. Но се заклучува дека квалитетот на повеќето владини планови за ограничување на климатските промени е многу низок.

Достигнувањето нето нула значи колку што е можно поголемо намалување на емисиите на стакленички гасови, а потоа балансирање на преостанатите емисии со, на пример, садење дрвја - кои го отстрануваат ЦO2 од атмосферата.

Повеќе од 140 влади ветија дека ќе достигнат нето нула, покривајќи 90% од глобалните емисии.

Но Следачот на климатските акции вели дека само мал број од нив имаат планови за постигнување на целта. Тој ги анализирал политиките на 40 земји и заклучил дека само мал број се оценети како „прифатливи“, покривајќи дел од емисиите во светот.

„Ако тие немаат планови како да стигнат таму, а нивните цели за 2030 година се исто толку ниски како што се повеќето од нив, тогаш искрено, овие нето нула цели се само неисполнето ветување за вистинска климатска акција“, рече Бил Харе, извршен директор на Климатски аналитики, една од групите зад Следачот.

Главниот двигател на јазот меѓу ветувањата и проекциите е континуираното производство на јаглен и гас, заклучува организацијата.

Легенда под Главна слика

Фото: ЕПА

Со фактот што Европа продолжува да плаќа милијарди долари за рускиот гас секој месец, таа и понатаму игра онака како што свири Кремљ, покажувајќи на тој начин дека е заробеник на сопственото задоволство.

повеќе

Грејната сезона заврши во месец април како и секоја година, но последнава беше со многу проблеми кои произлегоа од енергетската криза, од војната во Украина и генерално од светската економска криза.

повеќе

Откривањето на минатото ни помага многу да ги научиме изненадувањата на иднината.

повеќе