Кина масовно тестира три милиони луѓе, по само неколку заразени лица

Кина почнува масовно тестирање на три милиони луѓе за ковид-19 во Тијанџин, град на северот на земјата, и тестираше 4.015 лица во болница во Шангај по регистрирањето на неколку заразени лица.

Националната здравствена комисија денес регистрираше седум нови домашни случаи на зараза, од кои пет во Тијанџин и два во Шангај.

Локалните власти во Тијанџин изолираа станбена зграда во која се појавија нови случаи на зараза, како и болница и градинка.

Денес тие почнуваат да ги тестираат сите жители на областа Бинхај во Тијанџин, се наведува на страницата на локалната самоуправа на социјалните мрежи.

Властите во Шангај ја затворија болницата откако маж и жена во петокот вечерта по посетата на болницата биле позитивни на тестот на ковид-19.

Вкупниот број на потврдени случаи во Кина сега е 86.414.