Поезија

Најновиот превод на поезијата на персискиот филозоф, поет, правник, учител и суфист, Џелалудин Мохамед Руми (1207-1273), го приреди поетот Тихомир Јанчовски. Досега Руми го преведувале Илхами Емин, Михајло Свидерски и Ана Пејчинова, а Јанчовски својот избор песни од Руми го наслови „Два света“. Во издание на „Матица македонска“ книгата имаше промоција во Скопје, а стихови на Руми ќе се слушнат и на 30. Поетска ноќ во Велестово. Тука објавуваме избор на пет песни на Руми.

Во едицијата „Огнови“ на издавачката куќа „Антолог“ неодамна беше објавена новата поетска збирка „Напишан дом“ од Ана Голејшка. Стихозбирката е клуч од нова врата кон поезијата на Ана Голејшка и нејзините приватни растења, а тука објавуваме четири нејзини песни.

Стиховите објавени во најновата книга „Влакно на јазикот“ на Тихомир Јанчовски спонтано го наоѓаат патот до своите читатели. Стилски и тематски песните се продолжение на претходни објави на авторот, но тука без „влакна на јазикот“ тој пишува за сето лудило што годиниве наназад се случуваше на општествен план.

Дебитантската поетска книга „Актите се кастрирани“ на Катерина Гогова деновиве излезе од печат во издание на „Современост“ од Скопје. Збирката вклучува 48 песни поделени на 4 циклуси и воведна песна. Катерина Гогова (1989, Дојран) е студент на Медицинскиот факултет и е дел од тимот на Здружението на граѓани ХОПС – Опции за здрав живот, каде работи во програмата за намалување на штети кај корисници на дроги. Дел е и од неформалната граѓанска иницијатива „Ретвитни оброк“, која има за цел рециклирање и донирање храна на социјално загрозени категории граѓани.

Со стихозбирката „Јас. Елегии“ (Макавеј, 2017) поетот Михаил Ренџов (1936, Штип), повторно, ја доби наградата „Браќа Миладиновци“ на Струшките вечери на поезијата во 2017 година. Претходно, истата награда ја доби во 1982 за книгата „Нерези“. Во „Јас. Елегии“ поетот укажува на една тематска нитка – соочувањето со призраците на смртта.

Поетската книга „Сјајна ѕвезда со лавовска грива“ од Милан Јазбец, актуелен амбасадор на Република Словенија во Република Македонија, на словенечки и на македонски јазик, е објавена и во Македонија, во издание на „Матица македонска“. Во своите стихови Јазбец ги обединува сугестијата и мислата, сознанието и емоцијата, човечката желба и говорот на тајните, а тука објавуваме избор од неколку песни со нивниот автентичен прелом.

Триесеттата по ред книга поезија на поетот Ристо Лазаров е со наслов „Цедена“. Книгата ја објави „Везилка 2011“, додека знаменитиот „бунтовник по природа“ и „ангажиран интелектуалец“ во современата македонска поезија, Лазаров, форматот на книгата го остави ист како и последните десетина книги: седум циклуси по седум песни, плус една воведна песна. Тука објавуваме две песни од книгата, „Цедена насмевка“ и „Помпеја“.