Поезија

Два света – Руми

Најновиот превод на поезијата на персискиот филозоф, поет, правник, учител и суфист, Џелалудин Мохамед Руми (1207-1273), го приреди поетот Тихомир Јанчовски. Досега Руми го преведувале Илхами Емин, Михајло Свидерски и Ана Пејчинова, а Јанчовски својот избор песни од Руми го наслови „Два света“. Во издание на „Матица македонска“ книгата имаше промоција во Скопје, а стихови на Руми ќе се слушнат и на 30. Поетска ноќ во Велестово. Тука објавуваме избор на пет песни на Руми.

Капа за два света

Во мене постои страст што не
копнее по ништо од друг човек.

Дадено ми е нешто друго, капа што се носи
во двата света. Ми падна. Не е битно.

Едно утро отидов на место зад зората.
Извор на сладост што тече
и не престанува. Покажана ми е
убавина што може да ги збуни обата света,

но нема да предизвикувам хаос.
Не сум ништо освен глава оставена на земја
како подарок за Шемс.

Духот и телото

Не ги храни двете твои страни подеднакво.
Духот и телото носат различни товари
и бараат различно внимание.

Премногу често
ги ставаме дисаѓите врз Исус и го пуштаме магарето
слободно да си трча по ливадата.

Не давај телото да го прави
она што духот го прави најдобро, и не ставај голем товар
врз духот што телото може лесно да го носи.

Велат дека нема иднина за нас

Имаме огромно буре вино, немаме чаши.
Ако се прашуваме ние, тоа е одлично.
Секое утро се зажаруваме,
и навечер пак повторуваме.
Велат дека за нас нема иднина. Имаат право.
И ако се прашуваме ние, тоа е одлично.

Оддалечување од хаосот

Тајната не се разјаснува со повторување на прашањата,
ниту се плаќа со заминување на прекрасни места.

Без педесет години запирање
на немирот во очите и на чувството дека нешто ти недостига,
нема вистинско оддалечување од хаосот.

Сам во чамецот на своето битие

Доцна е, сам сум, во чамецот на своето битие,
никаде ни светло ни копно,
дебела опна од облаци. Се трудам да останам
над површината, а веќе сум под неа
и живеам во недрата на океанот.

Бидејќи знаеме да се перчиме со секој што потекнал од нашиве простори, дури и до илјадито колено наназад (од Аминта III до Симона Халеп), јас ќе ја искористам приликава за да се погордеам со македонските гени на еден извонреден музичар: Васил Хаџиманов.

повеќе

Коста Абрашевиќ, Гоце Делчев... и десетици илјади современици кои потпишале дека „по род се...", за да можат да патуваат и да работат во ЕУ државите.

повеќе

Наместо ефтини штосови на прес конференциите на СДСМ, ВМРО и ДУИ, на кои во несвест паѓаат само  партиските послушници, нивните лидери треба да одговорат на конкретни прашања.

повеќе