Поезија

Дебитантската поетска книга „Актите се кастрирани“ на Катерина Гогова деновиве излезе од печат во издание на „Современост“ од Скопје. Збирката вклучува 48 песни поделени на 4 циклуси и воведна песна. Катерина Гогова (1989, Дојран) е студент на Медицинскиот факултет и е дел од тимот на Здружението на граѓани ХОПС – Опции за здрав живот, каде работи во програмата за намалување на штети кај корисници на дроги. Дел е и од неформалната граѓанска иницијатива „Ретвитни оброк“, која има за цел рециклирање и донирање храна на социјално загрозени категории граѓани.

Со стихозбирката „Јас. Елегии“ (Макавеј, 2017) поетот Михаил Ренџов (1936, Штип), повторно, ја доби наградата „Браќа Миладиновци“ на Струшките вечери на поезијата во 2017 година. Претходно, истата награда ја доби во 1982 за книгата „Нерези“. Во „Јас. Елегии“ поетот укажува на една тематска нитка – соочувањето со призраците на смртта.

Поетската книга „Сјајна ѕвезда со лавовска грива“ од Милан Јазбец, актуелен амбасадор на Република Словенија во Република Македонија, на словенечки и на македонски јазик, е објавена и во Македонија, во издание на „Матица македонска“. Во своите стихови Јазбец ги обединува сугестијата и мислата, сознанието и емоцијата, човечката желба и говорот на тајните, а тука објавуваме избор од неколку песни со нивниот автентичен прелом.

Триесеттата по ред книга поезија на поетот Ристо Лазаров е со наслов „Цедена“. Книгата ја објави „Везилка 2011“, додека знаменитиот „бунтовник по природа“ и „ангажиран интелектуалец“ во современата македонска поезија, Лазаров, форматот на книгата го остави ист како и последните десетина книги: седум циклуси по седум песни, плус една воведна песна. Тука објавуваме две песни од книгата, „Цедена насмевка“ и „Помпеја“.

Поетесата Елена Пренџова (Скопје, 1985) е слемерка и антологичарка, дипломирана професорка по англиски јазик и книжевност и магистерка по филолошки науки со одбранет магистерски труд со наслов „Сонетот во англиската, италијанската и македонската книжевност“. Неодамна ја промовираше својата нова книга со есеи со наслов „Мини прирачник за поезија“, а тука објавуваме една од најновите нејзини песни.

Во текот на својот живот Ацо Караманов (1927-1944), поет и учесник во НОБ, не објавил ниту една поетска или прозна книга, но колку што е познато, од него се сочувани околу 280 поетски творби. Сеќавањето на него веќе 44 години го одржуваат „Карамановите поетски средби“, кои секоја година се случуваат во неговиот роден град Радовиш.