Завршни зборови за случајот „Тортура“

Очите на Мијалков и полициските „Алфи“ вперени во обвинителот: Бошкоски имал самоубиствени мисли и срамно бил уапсен „како последен идиот залепен за тоалет“

Случајот со апсењето на Љубе Бошкоски за случајот „Кампања" стаса до завршни зборови. Денес завршен збор во предметот „Тортура" прв даде обвинителот Љубомир Лапе, кој е од тимот на поранешното СЈО и продолжи да го застапува овој предмет по неговото згаснување. Додека обвинителот ги презентира завршните зборови, очите на обвинетиот ексдиректор на УБК, Сашо Мијалков и обвинетите полициски „Алфи", беа директно вперени кон обвинителот, особено во делот каде до детали ја раскажува снимката од апсењето на поранешниот министер за внатрешни работи, Бошкоски и каде вели дека имал самоубиствени мисли по апсењето.

Обвинителот Лапе на почетокот на завршни зборови пред судиите во Основниот суд изврши прецизирање на обвинителниот акт од каде ги избриша зборовите „Бел ден да не видиш“, бидејќи како што кажа, не се докажало дека овие зборови биле употребени и тој не бил убеден дека се користеле, а и Бошкоски не ги повторил во текот на судењето.

Ставот на обвинителот е дека Бошкоски е мачен поради политички причини и дека ова кривично дело мачење е слично со малтретирање во служба и дека и двете дела се извршуваат со злоупотреба на службената положба.

„Легнување на земја на оштетениот Бошкоски, малтретирање и прикажување пред камера било со намера да се наруши угледот на оштетениот. Се бришат зборовите „Бел ден да не видиш“ бидејќи не сум убеден дека овие зборови биле кажани и Бошковски не ги повтори. За време на апсењето и потоа Бошкоски доживеал душевно страдање, што се докажа од медицинска документација и имал здравствени тешкотии. Врз основа на медицинска документација, направено е и вештачење од Институтот за судска медицина и криминалистика во Скопје. Биле констатирани видливи крвни подливи, поради инфузија, но не е точно опишано кога тој примал инфузија. Вештаците во оваа постапка утврдиле пост-трауматско стресно растројство, анкзиозност и депресија. Душевното страдање се манифестирало со потење, страв, несоница.. Утврдена била поврзаност и причинско последична врска со чинот на апсење и психичкото страдање кое траело неколку месеци“, рече во завршен збор обвинителот Лапе.

Во текот на постапката, обвинителот посочи дека биле сослушани и докторот кој прв го прегледал Бошковски во затвор, а бил сослушан и затворскиот психијатар кој во својот исказ пред судот раскажал дека Бошкоски дури имал и самоубиствени мисли.

„Затворскиот лекар кажа дела не забележал ништо невообичаено, но забележал силна вознемиреност кај Бошкоски. Затворскиот психијатар кажа дека Бошкоски стресно ја доживеал случката дека бил уапсен во кафана, но не се навраќал многу на апсењето, и бил во состојба на анксиозност, чувство на безвредност, имал суицидални мисли и бил загрижен за егзистенцијата. Затворскиот психијатар кажал дека често се среќавал со Бошкоски на негово барање. Бошкоски бил посрамен бидејќи бил јавна личност и се чувствувал засрамен, и срамно му било да биде залепен за „тоалет како последен идиот“. Зарем има поголем доказ од начинот на апсење од снимката која се изведе во судската постапка, но и јавно се прикажуваше на сите телевизии и ден денес е јавно достапна на интернет“, праша обвинителот Лапе во својот завршен збор пред судот.

Тој до детали го опиша и апсењето на Бошкоски, односно како бил апсен и каде бил седнат опишувајќи ја снимката. Вели дека сите полицајци делуваат истовремено и синхронизирано и очигледно дека е по дадена наредба.

Обвинителот Лапе вели дека снимката е заматена и сечена во деловите каде има понасилни содржини, а за тоа наредбата е дадена од тогашната министерка за внатрешни работи Гордана Јанкулоска и нејзиниот тогашен помошник, Иво Котевски.

„Некој ќе каже дека ова е апсење како по учебник, но полицајците кои се обвинети влегле во ресторанот „Воденица“ па го чекале Бошкоски да излезе, а не го уапсиле во ресторанот кога влегле внатре“, вели обвинителот Лапе.

Судијката Александра Ристовска даде пауза од 20 минути, поради проветрување на судницата како препорака за заштита од ковид-19, по што судењето ќе продолжи со завршни зборови. 

К.Д.

Законот за високо образование јасно и прецизно ја пропишува постапката за избор во наставно-научни и соработнички звања на високообразовните институции во нашата држава-Македонија.

повеќе

На три месеци пред избори, Владата носи закони и уредби со катастрофални последици по граѓаните, што е просто неверојатно.

повеќе

ДУИ, која по конфликтот го вееше албанското црвено - црно знаме, потоа синото, на следните избори ќе го вее зеленото.

повеќе