Овде недостапен, а од Унгарија следи и знае се за процесот

Груевски кој во Македонија е бегалец, наместо во судница докази за „Плацеви на Водно“ од Будимпешта објавува на Фејсбук

Поранешниот премиер Никола Груевски кој е обвинет за делата „перење пари и за противправно стекнување и прикривање на имот" во случајот „Плацеви на Водно“, во Македонија се води како бегалец и недостапен на органите на прогонот. Но, во пракса се чини дека тоа не е така, бидејќи на својот Фејсбук-профил Груевски од Будимпешта, Унгарија каде политички доби азил постојано објавува реакции. Иако на доказите им е место пред правосудните органи, избеганиот премиер овде во државава не се соочува со никого во судница бидејќи побегна, а докази и факти наместо во судница, објавува на социјалните мрежи. 

Груевски, наместо да оди во затвор две години по пресудата во предметот „Тенк", во 2018 година побегна во Будимпешта каде што доби политички азил.

Последната негова објава ви ја пренесуваме во целост, а се однесува повторно на случајот „Плацеви на Водно“:

Уште еднаш фатени "живи" како местат судски случај како дел од политичкиот прогон на власта. Тоа што во Македонија се прави од обвинителството и судството кои сè уште продолжуваат да работат по инструкциите дадени од власта на Заев и од него лично, го нема ни во Африка.
Кратко, јасно и со доказ еве ги фактите.

Во т.н. предмет "Плацеви Водно" како сведок на обвинителството се појави Тања Стојановска, која раскажа дека по барање на нејзиниот шеф Александар Ивановски во јавноста познат по прекарoт "Алек Теранова" купила два помали стана кои години подоцна јас ги изнајмив и идејата на обвинителството е преку изнудени изјави на гореспоменатиот уценет бизнисмен и неговата секретарка да докажуваат дека становите биле мои, иако немаат никаков материјален доказ (ниту е можно да имаат), а и самиот Ивановски во неговата изјава во судот кажува дека никогаш за оваа тема не разговарал со мене туку дека трето лице му рекло да ги купи становите за мене (иако самиот А. Ивановски кажал во судот дека не ме познавал лично тогаш), а пак тоа трето лице во судот го негира истото.

Алексансар Ивановски становите ги купил на име на неговата секретарка Татјана Стојановска која, исто така, беше сведок и кажа дека се што знае за ова е што и раскажал нејзиниот шеф и според тоа на крајот сепак призна дека само претпоставува дека становите се мои.

Но под притисок на власта преку обвинителството, а на прашање во судот истата сокри дека има примено писмо по ДХЛ од мене во својство на закупопримач на тие станови, чија содржина ја објавив на фб на 10 декември 2021 година, кое писмо преку ДХЛ е пратено од мене на 01.02.2021 година, а примено е на 08.02.2021 година. Ако сака судот, обвинителството и адвокатот назначен од судот по службена должност веднаш може да го проверат истото во ДХЛ во Скопје и ќе се види дека сведокот не ја говорел вистината и преќутел битен факт.

Неодамна, во понеделникот на 17.01.2022 година, во истото својство испратив ново писмо исто така по ДХЛ на истата личност, сопственичка на становите и сведок на обвинителството Тања Стојновска.

Веројатно поучена од обвинителството кое работи по инструкција на власта, истата вчера во 15:13 часот одбила да ја прими пратката со образложение дека содржината не била нарачана од неа. Така има објавено ДХЛ.

Значи одбила да прими писмо испратено од мене со кого има потпишан договор за закуп на два стана (46м.кв. и 67м.кв). Во ред. Делумно разбирам.

Обвинителството и стои над глава, а особено на нејзиниот работодавач и шеф, па ги следи нивните инструкции, бидејќи ова е политички мотивиран случај каде обвинителството има задача по секоја цена да ме гони и да бидам осуден.
Доколку сакаат не само да се запознаат со содржината на писмото туку и да се уверат, а особено судот, како постапил сведокот, дали треба да му се верува на таков сведок, односно под каков притисок се наоѓа, обвинителството, судот и адвокатот назначен по службена должност можат веднаш уште денес, додека пратката е сè уште таму, да ги превземат сите законски чекори и привремено со судски налог да го запленат писмото кое од вчера 20.01.2022 год. е вратено во ДХЛ Македонија.

Ако некој не верува дека сведоците на обвинителството се притиснати да кријат докази кои на обвинителството не му одговараат, слободно нека напишат на интернет "DHL Macedonia", потоа нека кликнат на "Tracking", и нека го впишат tracking code: 5177084065. Сè ќе им излезе и сè ќе им стане јасно.

За оние кои не им се прави ова, подолу фотографија од истото.
Исто така и фотографија од потврдата од DHL Hungary издадена во моментот кога ја испратив пратката со писмото, каде се гледа "tracking code" на која потврда од разбирливи причини ги покрив адресите, телефоните и е-mail адресата.

Следното рочиште за овој предмет е закажено за 24 јануари.

Случајот го води судијата Илија Трпков, а застапник на обвинението е обвинителката Лиле Стефанова.

Според обвинението, Груевски е обвинет за делата „перење пари и за противправно стекнување и прикривање на имот", неговиот кум Ристо Новачевски, бизнисмените Ненад Јосифовиќ, Јордан (Орце) Камчев и Ратка Куновска Камчева се товарат за „перење пари", а првиот братучед на Груевски и поранешен директор на УБК, Сашо Мијалков, е обвинет за „помагање при кривично дело перење пари и други приноси од казниво дело. 

Во саботата во јавноста го претставивме предлог-ребалансот на Буџетот за 2022 година, откако истиот беше усвоен од страна на Владата.

повеќе

Наспроти сесловенскиот и општоевропскиот карактер на нивната дејност, Кирил и Методиј станале објект на присвојувања уште од средниот век.

повеќе

За пишувањата на Хари Костов за проблемите на државата – ако компетентен човек зборува за нефункционирањето на правната држава, кое има директен одраз врз економијата, не може тоа да се заврши со охридскиот уличен жаргон.

повеќе