Судство

Со гледање на снимка од собраниската седница на денот на насилството во Собранието на 27 април мината година продолжи судењето за упадот во законодавниот дом.

Во Кривичниот суд за денеска е закажано ново рочиште за случајот „Топлик" на Специјалното јавно обвинителство, каде првоосомничен е ексминистерот за транспорт и врски Миле Јанакиески, за продажба на државно земјиште за изградба на комплексот „Сончев град" во Сопиште.

Со две автоматски пушки „калашников“ и еден пиштол било извршено петкратното убиство кај Смилковско езеро. 13 чаури биле испукани од пушките, 8 од пиштилот. На терен биле пронајдени 8 испукани проектили. По пет години крим техничарите се вратија во судница и ги презентираа и досега познатите заклучоци за случајот „Монструм".

Обвинетите за случајот со петкратното убиство ќе се жалат на исказот на загрозениот сведок. Адвокатите на обвинетите за случајот „Монструм", односно петкратното убиство кај Смилковското Езеро најавија жалба на исказот на загрозениот сведок Е1, кој на минатите рочишта сведочеше во овој предмет. 

Разлики во бројките од записниците и дополнителните преправки во нив, биле дел од причините заради кои, според дел од денешните сведоци во предметот „Титаник 3", е повторено гласањето на неколку Избирачки места за Локалните избори 2013 година во Општина Чаир.

На еден од разговорите помеѓу експремиерот Никола Груевски и поранешниот министер за транспорт и врски Миле Јанакиески пуштен на денешното рочиште за случајот „Титаник" се слуша како Јанакиески му ги соопштува прелиминарните резултати на Груевски од првиот изборен круг на локалните избори во 2013 година, каде констатира дека во општина Центар е лоша ситуацијата, односно дека водат на само две избирачки места во Капиштец, пренесува Макфакс. 

Со слушање „бомби" во Кривичниот суд во Скопје продолжува судењето за „Титаник“ на СЈО за изборните нерегуларности. Во судница се присутни сите обвинети, меѓу кои поранешниот премиер Никола Груевски, како и екс министрите за транспорт и врски Миле Јанакиески и за внатрешни работи Гордана Јанкулоска.