„Веќе подолго време е евидентно дека лошото управување со здравствената криза го собира својот арач. Негативните последици од ковид-пандемијата веќе се чувствуваат во секоја општествена пора. Обичниот човек постојано осиромашува, додека приватните здравствени установи водени од домашната бизнис - елита, непрекинато профитираат. Од новиот владин состав решение или стратегиска визија нема ниту во најава“, се вели во соопштението во кое партијата додава дека очајната борба за партиципирање во власта е сведена на безидејни партиско - кадровски решенија, кои немаат капацитет да направат каква било промена.
Откако го изнесува податокот дека од почетокот на пандемијата спроведени се 1.665.043 тестирања, од кои 2/3 или 1.205.902 Ковид тестови граѓаните ги платиле приватно, Левица забележува дека еден од начините преку кои државата ги принудува граѓаните да плаќаат тестови во приватните лаборатории е тоа што матичните лекари не можат да закажат термини за тест во државна лабораторија, а кога ќе најдат слободен термин, тогаш тоа е најчесто во друг град кој е далеку од местото на живеење на пациентот. Според партијата, дури и кога матичниот ќе успее да закаже тестирање, истото може да се чека по неколку дена, што ако се земе во предвид ургентноста и спецификата на проблемот, ова за пациентот може да биде фатално.
„По примерот на бројни земји, Левица бара државата целосно да го преземе под своја надлежност процесот на тестирање од приватните клиники, барем во време на пандемијата. Инсистираме спроведувањето на тестовите да биде обезбедено од буџетски средства, што ќе овозможи достапно и бесплатно тестирање за сите граѓани, со што ќе помогне за остварување на уставно загарантираното неприкосновено право на живот и право на здравствена заштита на граѓаните“, додаваат од Левица.
