Реакција на соопштенијата од СДСМ

Град Скопје: Да имавме ингеренции за парното можеби и Шилегов ќе преземеше нешто

„Очигледна е политичката задница во нападите кон Град Скопје. Петре Шилегов од СДСМ, беше градоначалник на Скопје пред грејната сезона, како и за време на почнувањето на грејната сезона на 15 октомври. Да имал тој ингеренции во својот мандат, веројатно, Градот ќе презел нешто. Но не само што не преземал ништо, туку нема ниту определено средства во Буџетот на Градот Скопје за оваа намена, ниту за какви било мерки за решавање на состојбите со кризата“, реагира Град Скопје на соопшенијата од СДСМ.

СДСМ треба да ја понесе одговорноста за несправување со енергетската криза со која се соочени граѓаните во сите општини во Македонија, а не само во Скопје, велат од Град Скопје и нагласуваат дека СДСМ не презема ништо за носење мерки за заштита на граѓаните од ценовни шокови, иако знаеше дека државата ќе биде соочена со енергетска криза.

„Наместо да се обидува СДСМ да ја дефокусира јавноста, треба да покажат дека се власт на централно ниво, а не опозиција и, како сите други влади во Европа, иако задоцнето, да донесат мерки и да им излезат во пресрет на граѓаните. Сите влади од Европа уште од септември 2021 година донесоа мерки за заштита на граѓаните од ценовниот шок предизвикан од енергетската криза“, се вели во соопштението на Град Скопје.