„Секојдневно пласираат дезинформации и невистини, ја редефинираат историјата, образложуваат зошто Бугарија ставила вето на евроинтегративниот процес на Македонија и во суштина носителите на високи партиски и државни функции во Бугарија се натпреваруваат со тешки навреди спрема македонскиот народ, а крајната цел е да добијат политички поени. Ваквата предизбирна кампања и натаму ги труе и влошува односите меѓу двете држави, но таа кампања е поефективна доколку сите тие национал-шовинистички изјави јавно ги коментираме.
Наш став е дека треба да ги оставиме тие самите да се гушат во национализамот и ниското ниво на комуникација. Фрлајќи кал по нас тие ќе заглават во истата“, пишува во соопштението од Демократски сојуз.
Македонија е суверена држава, со своја автентична историја, народ и јазик и, како што велат, наместо да кукаме, ние треба како држава да подготвиме Акциски план за приоритетните реформи и имплементација на европските вредности и да се движиме по патот кон Европската Унија.
„Потребни се реформи на судскиот систем, ефикасна борба против криминалот и се разбира справување со пандемијата и прилагодување на економијата во услови на тешка здравствена криза“, додаваат од партијата.
