Нови 125 професионални војници во АРМ (ВИДЕО)

Министерката за одбрана Радмила Шекеринска денеска присуствуваше на свеченост во касарната во Велес на која им беа врачени договорите за работа на новопримените 125 професионални војници во Армијата на Република Македонија.

На свеченоста присуствуваа заменик-министерот за одбрана Беким Максути, началникот на армискиот Генералштаб, генерал Васко Ѓурчиновски, директорот на Генералштабот, генерал Зоран Милевски, командантот на Здружената оперативна команда, генерал Павле Арсоски и командантот на Командата за обука и доктрини, полковник Љубенчо Петровски.

Обраќајќи се од свечената говорница, Шекеринска потенцира дека денот кога еден млад човек започнува со нова професија со негов избор е ден кога се упатуваат многу различни пораки и се посакува  успех, резултати во работењето и голема упорност, трпеливост и трудољубивост.

„Јас ќе изберам денеска да ви кажам дека најголемата шанса за успех кога почнувате свој професионален развој во една професија, која навистина е тешка и одговорна, е да го сакате својот позив и својата професија и тоа да ве тера секогаш да бидете и подобри и секогаш поуспешни“, им порача министерката Шекеринска на младите професионални војници.

Таа потсети дека тие поминаа темелен процес на тестирање и денеска се тука заедно со своите колеги како класа на 125 новопримени професионални војници во Армијата. Министерката нагласи дека тоа покажува оти војничката униформа, војничкиот живот, бдеењето над нашата земја, одржувањето на мирот и стабилноста и можноста да им се помогне на сите граѓани е токму професијата што тие вистински ја посакуваат, но и дека Армијата не може без нив.

„Таа ве избра да бидете дел од еден процес што успешно ќе ги заокружи стратешките приоритети на нашата земја. Од денеска влегувате во една организирана Армија која поседува и квалитет и знаење да продолжи да биде гарант на безбедноста на сите граѓани. Армија која поседува квалитет и знаење да биде дел од најмоќниот воено-политички сојуз во светот на денешнината. Како министерка за одбрана и претставник на Владата, заедно со првите луѓе на Генералштабот стоиме зад вас и ве подржуваме и правиме напори вашиот живот како војници да ја отсликува реалноста – тоа да биде Армија на држава што де факто е членка на НАТО, а вие сте еднакви со припадниците на најмоќните армии“, нагласи Шекеринска.

Таа потсети дека дел од нивните колеги како професионални војници се на обука во САД и Велика Британија, дел од старешините се на Високи школи во Турција, Италија, Бугарија и Германија, дел се на вежби во Црна Гора, Германија и Словенија, а некои се дел од нашите мисии во Авганистан, Босна и Херцеговина и Либан.

Шекеринска на војниците им вети дека Министерството за одбрана ќе направат се што е во негова моќ „отворените врати кон светот да бидат што поотворени“, а како полноправна членка на НАТО „нашата видливост уште повеќе да се зголеми“.

Таа  најави дека во втората половина од 2019 година, фокусот на Министерството е на набавка на борбени возила и на заштитна опрема за сите војници.

Шекеринска информира дека по овие 125, до крајот на годинава кон Армијата ќе се приклучат уште дополнителни 125 професионални војници, со што ќе има подмладување на армискиот состав, додавајќи дека и во наредните години ќе продолжи ангажирањето на нови професионални војници.

Според неа, ќе продолжи и зголемувањето на средствата за Армијата се до исполнување на целта – два проценти од бруто домашниот производ да одат за потребите на безбедноста на земјата. Таа воедно потсети дека платите во Армијата на почетокот на минатата година пораснале за 10 проценти и најави дека од септември тие ќе бидат дополнително заголемени за уште пет отсто.

Шекеринска информира дека континуирано се врши исплата на дневници за дополнителната работа, а со новите измени во Законите за служба и за одбрана се предвидени дополнителни можности за подобри услови и за војниците и за офицерите во Армијата.

Во изјава за медиумите по свеченоста, Шекеринска потенцира дека Министерството две години по ред обезбедило поголеми буџети, зголемување на платите и прием на нови припадници во Армијата.

„Фокусот сега ни е на подобрување на одредени законски решенија. Се надевам дека ќе влезат во собраниска процедура на крајот на август или на почетокот на септември. Втората фаза на приоритетните проекти е модернизација и по 16 години Армијата доби нови инженериски машини, кои се важни и за Армијата и за граѓаните“, изјави Шекеринска, додавајќи дека Армијата сега може да интервенира.

„Сметам на вас“. Со овие зборови, претседателот Макрон апелираше до граѓаните на Северна Македонија да гласаат за Преспанскиот договор на референдумот на 30 септември 2018.

повеќе

Сѐ додека Македонија ја претставуваат „политички најподобните" ќе тонеме длабоко и уште повеќе ќе се раслојуваме.

повеќе

По определувањето на мерката ефективен притвор, притворениот раководен функционер не може да издава полноважни правни акти, меѓу другото, и поради фактот што го нема службениот печат.

повеќе