Отворена порта

Моето име е Самир, и бев жртва на трговија со луѓе!

Ми вети работа и одлична плата. Еј - си реков - ми тргна во животот! Сега знам дека бев затвореник, роб.

Се викам Самир. Имам 20 години. Пред 3 години завршив средно училиште и почнав да барам работа. Пријатели ми кажувале дека во странство животот е поубав, повеќе пари се заработуваат и си реков да пробам. Побарав по огласи и најдов човек што посредуваше за работа во странство. Рече ќе ме вработи во фабрика за мотори. Ми вети одлична плата. Еј - си реков - ми тргна во животот! Малку и се плашев, непозната земја, немам никој таму ама човекот вети дека ќе ми најде и сместување и за пат ич да не се секирам. Ми обезбеди работна виза и ми ја покажа. Тоа ги увери и моите родители дека се ќе биде во ред и ќе ми се отвори патот кон убав живот. 

Тргнавме едно утро во комбе десетмина, сите возбудени. Посредникот ни ги собра пасошите уште на граница, за да поминеме граница, и веќе не ги видовме. Уште кога стигнавме некако ми се чинеше дека не е сѐ како што треба. Нѐ сместија во изолирана куќа во соби по четворица со стари кревети на спрат. Брзо открив дека не е сѐ така како што ми беше ветено. Нѐ однесоа да работиме на објект во изградба. Посредникот нѐ убедуваше дека нема слободни позиции во фабриката за мотори привремено треба да работиме градежништово додека да нѝ среди за ветената работа. Работев по 12 часа некогаш и повеќе, од платата не видов ништо ме убедуваше дека морам да заработам за да му го платам патот и неговите услуги но тој им праќа на моите по нешто од мојата заработувачка. Сега знам дека бев затвореник, роб. Не ни дозволуваа да излегуваме од куќата, понекогаш смеев да се јавам дома но ми се закануваа дека ако се пожалам ќе ме исфрлат на улица и ќе завршам во затвор во туѓа земја без никој да знае каде сум. 

Како се спасив? Сепак имало луѓе на светов. По 6 месеци веќе бев без надеж, без желба за живот. Ме преместија да работам на друг објект. Една постара жена редовно го шеташе кучето околу градилиштето. Еднаш кучето дотрча до мене и почнавме разговор, колку што можевме да се разбереме оти не го зборував јазикот добро. Ме посоветува да избегам во текот на рабoтното време и ми помогна да го пријавам случајот во полиција. 

Ова е само една од бројните приказни во светот на жртвите на трговија со луѓе со цел трудова експлоатација. 

Самир смета дека луѓето многу малку размислуваат за ризикот кој се крие позади само еден клик.„Кога ќе најдете оглас на Интернет не очекувате некој да ве измами. Ако некој ме советуваше, тогаш немаше да доживеам толку тешки моменти. Но, имав среќа, се спасив".

 

(Со цел да се намали ризикот од трговија со луѓе со цел трудова експлоатација, Отворена порта подготви неколку видео стории за подигнување на јавната свест за заштита од трговија со луѓе. Кампањата Не Се Залетувај! се спроведува од невладината организација Отворена порта Ла Страда со поддршка на Европската унија и Советот на Европа.) 

Критичкото малцинство, на 2020 година не гледа само како на година која ја донесе вирусната пандемија, туку и како на година која донесе и еден друг вид на пандемија, онаа на КОВИД-авторитаризмот.

повеќе

Во моментов, мал број проекти или иницијативи во Македонија се фокусираат на тоа како универзитетите ги подготвуваат студентите за општествена одговорност и за граѓанскиот статус.

повеќе

Попис на населението во 2020 треба да има, затоа што тоа утре може да биде услов за Македонија да чекори напред кон ЕУ.

повеќе