Заев од Атина: Предлогот не е најдобар, но најважните прашања за нас се во преговарачката рамка

Предлогот не е најдобриот, но ние сме Балкан, треба да го искористиме моментумот. Најважните прашања за нас, нашиот идентитет и нашиот македонски јазик се ставени во преговарачката рамка, рече Зоран Заев на конференцијата на „Економист“ во Атина. 

Заев изјави дека верува дека „овие денови Северна Македонија и Европската унија прават историски чекор напред”. Според него, последниот предлог на француското претседателство е добра основа за Македонија да го почне преговарачкиот процес што за сите земји започнува со меѓувладина конференција и со скрининг. 

„Секако, предлогот не е најдобриот, но ние сме Балкан. Треба да го искористиме моментумот, имајќи на ум дека најважните прашања за нас, нашиот идентитет, Македонци од Северна Македонија и нашиот македонски јазик се ставени во преговарачката рамка, јасно, како и сите други јазици и ќе стане иден официјален јазик на Европската унија“, рече Заев и додаде дека треба да се земе предвид и да се искористи фактот што „ЕУ во иднина ќе биде на маса со нас и Бугарија, дури и за билатерални прашања, преку преговарачкиот процес”.

Заев додаде дека она што е важно е дека се гарантирани македонскиот идентитет и јазикот, изрази надеж дека францускиот предлог ќе добие мнозинство во Собранието, а актуелната Влада ја советуваше да покаже лидерство.

„Ја советувам владата да преземе лидерски одлуки, тоа го сторивме со мојот пријател Алексис Ципрас со потпишување на Договорот од Преспа што донесе стабилност, донесе добри пораки до Европската Унија дека овде на Балканот, на европски начин можеме да најдеме решение на многу тешки прашања, преку дипломатија и дијалог и продолжуваме да сме добар пример за Европската Унија и се надевам дека Северна Македонија ќе продолжи и преку прифаќањето на предлогот од ЕУ и конечно после 17 години ќе почне преговори“, рече Заев и додаде дека процесот ќе ги охрабри и останатите земји од регионот.

Тој истакна дека Северна Македонија донесе многу тешки одлуки во изминатите неколку години. Земјата испорача мир и стабилност во регионот и во Европа, заедно со реформите во земјата, а паралелно, потенцираше дека стратешкиот интерес на земјата е веднаш да започне преговори за членство со ЕУ.

На присутните на конференцијата им објасни дека ова е „драматичен момент во Северна Македонија“, бидејќи во тек е процес на консултации на Владата со опозициските партии, со владините партии, со експерти итн.

Тој рече дека денеска, утре или задутре Собранието ќе треба да гласа и изрази уверување дека ќе постои мнозинство, истакнувајќи дека „она што е важно е да одиме напред кон ЕУ бидејќи нема алтернатива“.

Војната во Украина ја разоткри вистината за Русија, но и вистината за Европа. 

повеќе

Несанкционирањето на овој говор доведува до повторување, ширење и злоупотреба на овие аномалии како еден вид „нормализиран“ начин во политичката борба против поединци и групи со различни мислења.

повеќе

Потписниците на нотарските изјави дека нема да гласаат за измените на Уставот се подложни на промени за материјално благо.

 

повеќе