Собрание

Собраниските комисии сѐ уште не се формирани, парламентарното мнозинство е без двајца пратеници

Пратеникот на ДУИ Арбен Зибери е хоспитализиран на Клиниката за инфективни болести откако заболел од ковид-19, а не е верификуван и мандатот на пратеничката од листата на СДСМ која треба да дојде на местото на Јагода Шахпаска, сега министерка за труд и социјална политика. Собраниското мнозинство има 62 пратеника, а без овие двајца владината коалиција меѓу СДСМ и ДУИ нема мнозинство. Сепак, од СДСМ и од ДУИ уверуваат дека неделава ќе биде закажана собраниска седница.

Мандатот на пратеничката која ќе влезе на местото на Шахпаска ќе може да биде верификуван дури откако ќе биде избрана Комисијата за деловнички и мандато-имунитетски прашања. За ова, а и за другите 20 собраниски комисии сѐ уште нема договор меѓу пратеничките групи. Опозицијата веќе ги даде своите кандидати за претседатели на 8 собраниски комисии, но таков предлог сѐ уште нема од владеачкото мнозинство. Нова собраниска седница на која ќе се избираат претседателите и членовите на собраниските комисии сѐ уште не е закажана.

Премиерот Зоран Заев вчера изјави дека парламентарното мнозинство е стабилно и дека очекува во текот на следните денови Собранието да направи верификација на мандатот на следниот пратеник на листата по Јагода Шахпаска, за коалицијата која има поддршка од 62 пратеника да биде целосно потврдена. Тој најави дека парламентот веројатно ќе го напуштат и други пратеници, бидејќи ќе добијат раководни позиции во извршната власт. Верувам дека стабилноста на парламентарното мнозинство низ добрите политики може само да расте, рече Заев.

Според договорениот принцип осум претседатели на собраниски комисии треба да бидат од  СДСМ, осум од ВМРО ДПМНЕ, три од ДУИ и две места за Алијанса-Алтернатива.

Според собранискиот Деловник, на опозицијата ѝ припаѓаат претседателските места во Комисијата за финансирањеи буџет, како и во комисиите за надзор на разузнавачките служби и на мерките за следење на комуникациите.

„Се прават подготовки за новата собраниска седница на која ќе се изберат собраниските комисии. Не гледам никаков проблем и мислам дека тоа ќе се реши деновиве“, изјави вчера пратеникот Изет Меџити од ДУИ. Тој рече дека претседателот на Собранието ќе раководи со Уставната комисија, ДУИ ќе раководи и со Комисијата за здравство, а дилемата е дали ќе раководи и со Комисијата за европски прашања или со Комисијата за образование.

Во моментов, мал број проекти или иницијативи во Македонија се фокусираат на тоа како универзитетите ги подготвуваат студентите за општествена одговорност и за граѓанскиот статус.

повеќе

Попис на населението во 2020 треба да има, затоа што тоа утре може да биде услов за Македонија да чекори напред кон ЕУ.

повеќе

Северна Македонија, исто така, мора да се придвижи кон енергетска независност, користејќи обновливи извори на енергија кои нема да му наштетат на кревкиот екосистем во оваа прекрасна земја.

повеќе