Во услови на пандемија

Собранието се подготвува и за онлајн седници, опозицијата е против

Собранието работи на барање алтернативен начин за одржување седници во вонредни услови, односно онлајн седници и гласање поврзано со пандемијата со ковид-19, состојбата која според последните проценки ќе потрае и следните две години. Собранискиот претседател Талат Џафери на брифинг со новинарите истакна дека за утврдување на таквиот алтернативен начин на работа ќе бидат потребни два до три месеци, па сега засега седниците ќе се одржуваат во салата со купола, а гласовите ќе се бројат рачно.

„Како претседател на Собранието обврзан сум да размислувам за функционалноста на Собранието и во редовна ситуација и во вонредна ситуација и затоа на првите средби на координација ја изнесов идејата за размислување по однос на алтернативните можности за работа на Собранието. За жал, таа идеја се искористи да се спинува како обид на мнозинството, на претседателот за да се одбегне редовната работа на Собранието и со тоа да се надополни недостигот можен на кворум и со тоа фактички од дома да можат да работат пратениците. Не, не е таа идејата“, потенцираше Џафери.

Основната идеја, според него, е Собранието да работи во нормални услови како што е пропишано, но факт е дека во овие три децении немаме пропишано работа на институцијата и функционирање на институцијата во вонредни услови.

„Пандемијата ни покажа дека е неопходно да се има во предвид и алтернативна можност за работа во такви услови. Денеска е пандемија, утре може да биде друга причина за алтернативна работа на Собранието, задутре може да има трета причина – може да биде пожар, може да биде земјотрес, може да биде не знам што, кое ќе предизвика вонредна состојба и во такви вонредни околности како ќе работи Собранието, кај ќе работи Собранието. Затоа велам дека алтернатива за функционалност на институцијата, за институцијата, за граѓаните треба да имаме, а не никако како што се обидува тоа да го пренесат и да го претстават како обид на мнозинството да се надополни можното немање кворум“, потенцира Џафери.

Опозициските ВМРО-ДПМНЕ и Алијанса за Албанците реагираа дека не е можно да има онлајн Собрание, затоа што тоа е спротивно на Уставот. Тие се сомневаат дека тенкото владејачко мнозинство од 62 пратеници на овој начин сака да обезбеди кворум за работа на парламентот од 120 пратеници.

Лани се одржале 105 седници, а најредовните пратеници присуствувале на над 100. Лидерите на политичките партии ретко доаѓаат на седници. Али Ахмети,лидерот на ДУИ лани присуствувал само на 14 седници, а лидерот на ДПА Мендух Тачи дошол во Собрание само 7 пати. И двајцата се дел од владејачкото мнозинство и во новото Собрание.

За в понеделник е предвидена собраниска седница на чиј дневен ред ќе биде избор на составот на работните тела на Парламентот, а потоа и верификација на мандат на пратеник на местото на министерката за труд и социјална политика Јагода Шахпаска.

Во Собранието досега се пристигнати законските предлози на Владата за основно и средно образование, како и петте одлуки за вонредната состојба од претседателот на државата Стево Пендаровски.

Каракачанов: На Бугаринот паметот му доаѓа следниот ден...

повеќе

При еден спор, понижувањето не е добро ниту за победникот, ниту за поразениот; ниту за „победникот“, ниту за „поразениот“.

повеќе

Стравот од неизвесноста што ја носи пандемијата од ковид-19 вирусот, бара да се преструктуираме и да го промениме начинот на нашето однесување и работење.

повеќе