Лидерот на Беса бара лидерска средба за уставни измени

Што вели Касами во поканата за средба со лидерите на партиите на Албанците?

Како што беше најавено вчера Движењето Беса веќе ја подготви поканата што претседателот Биљал Касами ја упатува до лидерите на другите партии на Албанците на која ќе се разговара за заеднички настап во барањето од Уставот да се избрише одредбата „20 проценти“ која се однесува на официјална употреба на јазик на етничка заедница која е застапена со најмалку 20 проценти од населението на државно или локално ниво и таа да се замени со „албански јазик“ како официјален.

Во поканата до која дојде ТВ Алсат се вели:

„Една од главните точки на која се обврзавме е официјализирање на албанскиот јазик во РСМ, додека Уставот на државата има погрдна дефиниција за албанскиот јазик, затоа иницирањето на состанокот на заедничката маса има за цел да го обедини албанскиот политички фактор со цел да се отстранат погрдните поими како што е случајот '20%' и да се дефинира албанскиот јазик во Уставот согласно нашите заеднички определби", им пишува Касами на партиските лидери.

Извори од Беса велат дека поканата е упатена до: Али Ахмети, претседател на ДУИ, Арбен Таравари, в.д. претседател на Алијансата за Албанците, Мендух Тачи, претседател на ДПА и Африм Гаши, претседател на Алтернатива.

Касами препорачува местото и времето на состанокот да бидат утврдени во комуникација со партиските генералните секретари.