По вчерашната лидерска средба

Што договорија Заев и Мицкоски, првиот е за Катица Јанева, вториот е за нејзина смена

Работни групи на СДСМ и на ВМРО – ДПМНЕ од денеска ќе работат на новиот предлог закон за јавно обвинителство со кој се предвидува интегрирање на Специјалното јавно обвинителство во Јавното обвинителство, најавија по вечерашната средба во Владата премиерот Зоран Заев и лидерот на опозициската ВМРО-ДПМНЕ Христијан Мицкоски.

На средбата се разговарале за обезбедување услови за одржување фер и демократски претседателски избори и за реформските закони, меѓу кои се и законите за разузнавачките служби.

Заев и Мицкоски не разговарале за предвремени парламентарни избори, а не било  прифатено барањето на ВМРО-ДПМНЕ на нивен предлог да се избира државниот јавен обвинител.

„Ќе обезбедиме изборите да бидат кристално чисти што е важно и од државен и од партиски аспект, изјави Заев, посочувајќи дека верува оти  во предизборието, текот на изборната кампања и на самиот изборен процес сите политички чинители ќе делуваат во таа насока за да не се даде ниту еден аргумент на Европската Унија што би бил слабост во пресрет на добивањето датум за преговори во јуни.

Според Заев, било договорено 20 дена пред почетокот на камапањата да завршат сите јавни настани и промоции, а доколку е потребно на одредени места посочени од опозицијата да се повика на дополнителен мониторинг.

„Фаворити сме со Стево Пендаровски и тоа е најголемата гаранција за кристално чисти избори за да има поголем легитимитет и да биде претседател на сите граѓани, дури и на тие кои гласале за противничкиот табор“, изјави Заев.

Договорено е во текот на изборите да комуницираат изборните штабови.

„Нашите ставови се јасни,  ова Специјално јавно обвинителство треба да се вгради во јавно-обвинителскиот систем на Република Северна Македонија, каде што треба да му се даде шанса на овој капацитет кој е создаден во државата да продолжи на чело со Катица Јанева и целиот тим, не само обвинители, туку и истражители, целиот тим и да биде репер и на тоа ниво ги подигаме капацитетите на останатите јавни обвинителства“, потенцира премиерот Заев.

Тој очекува низ разговарите да се создадат услови законот да се поддржи консензуално.

„Треба некаде до крајот на март да изградиме заеднички ставови и да ги изгласаме сите реформски закони, вклучително и овој закон. Значајно е што во самиот закон има лимитирање на користењето на неовластените прислушувани материјали, а тоа дава за право и опозицијата да го земе ова за алатка, на овие капацитети на севкупното јавното обивнителство да му дадат шанса да видиме како ќе се однесува кон владејачката гарнитура, рече Заев.

Тој нагласи дека ќе даде поддршка на ова СЈО и на сите личности кои работат во него, заради тоа што, тоа СЈО беше искрата на надеж за  враќање на правната држава.

„Сите тие луѓе почнувајќи од Катица Јанева ќе ја имаат мојата поддршка како политичар доколку дојде јас да одлучувам за таа работа. Одлуките ги носи Советот на јавни обвинители, а тоа е предвидено во закон“, појасни Заев и додаде дека ќе остане зад нив до самиот крај.

На прашање на новинарите за обвинувањата од опозицијата за политичко влијание врз СЈО, Заев со одговор „апсолутно не“ и истакна оти конечен гарант дека нема политичко влијание е меѓународната заедница.

Според Мицкоски, средбата била корисна за релаксирање на политичките околности за кредибилен изборен процес и претседателска трка и за неоходната реформска агенда за државава да добие датум за преговори со ЕУ.

Мицкоски посочи дека изнеле забелешки во насока на обезбедување кредибилни претседателски избори и оти, меѓу останатото, потенцирале места за кои имале докази за неправилности за време на референдумското изјаснување.

Многу нешта, потенцираше Мицкоски, ќе зависат од Владата бидејќи таа ги организира изборите.

„Разговаравме и за предогот закон за јавно обвинителство, предлог текстот го добивме во четврток така што немавме многу време да се посветиме на супстанцата на самиот закон. За нас значајно како политичка партија е тоа што овој специјален јавен обвинител го загуби комлетниот и личен и професионален кредибилитет за да ја добие нашата поддршка во иднина. Принципиелно интегрирање на СЈО како дел од Јавното обвоинителство можеме да го отвориме како тема и да го дискутираме бидејќи е дел од сетот реформски закони“, рече Мицкоски.

Тој неколку пати повтори дена на наредните претседателски избори ќе победи нивната кандидатка Гордана Силјановска.

Мицкоски му го повторил на Заев предлогот државниот јавен обвинител да биде именуван на предлог на опозицијата. Овој предлог бил одбиен од Заев.

Лидерот на опозицијата побарал расчистување на некои стари случаи од периодот на транзицијата, како приватизацијата на ЕСМ или Телеком и отворање на еден нов процес на лустрација.

За изборите, Мицкоски најави координација меѓу изборните штабови на власта и на опозицијата и оцени дека има многу пропусти во предизборието, како вработувања во администрацијата и трансфери од единиците на локалната власт во државната управа, но и промотивни активности, иако кампањата сѐ уште не е почната.

Демонизирањето на Исламот и неговото постојано поврзување со тероризмот е загрижувачка појава во светот, а и на Балканот.

повеќе

Последните искричења во меѓународниот поредок ја прават нејасна агендата за евроатлантски интеграции на регионот која претставува неопходен услов за долгорочна стабилност на Западен Балкан.

повеќе

Очигледно во градењето на македонското општество заборавивме да ја промовираме правдата како негова примарна цел.

повеќе