Албанскиот премиер со коментар под фотографија со македонскиот премиер

Рама: Сè уште го чекаме Годо? Не, ние сме навикнати на оваа шарада

Албанскиот премиер Еди Рама, познат по своите духовити досетки, често пати со иронизирачки тон, повторно се јави од Брисел, овојпат со порака преку Твитер како коментар на фотографија на која тој е сликан заедно со македонскиот премиер Димитар Ковачевски. Навикнати сме на оваа шарада, порачува Рама од местото каде се одржува Самитот за Западен Балкан од што, нагласува, тој нема очекувања за Албанија и Македонија,

„Сè уште го чекаме Годо? Не, ние сме навикнати на оваа шарада и повеќе од кога било сме посветени да ја поттикнеме модернизацијата на нашите земји и нашиот регион со непоколеблив европски дух“, напиша Рама под фотографијата.

Претходно, во изјава за медиумите кои го следат Самитот, Рама изјави дека нема никакви очекувања од Европската Унија, затоа што, како што потенцира, „срамота е што една земја членка на НАТО - Бугарија, блокира две земји членки на НАТО - Албанија и Северна Македонија“.