Во Белград

Oтворена „Винска визија“ вкрстени патишта на балканското вино, македонското како предводник

На отворањето на Првиот меѓународен саем за вино, храна и туризам „Винска визија на Отворен Балкан" во Белград, претседателот на Србија Александар Вучиќ и премиерите на Србија, Македонија, Албанија и премиерот во заминување на Црна Гора, Ана Брнабиќ, Димитар Ковачевски, Еди Рама и Дритан Абазовиќ порачаа дека тука се вкрстуваат винските патишта на Балканот, се пресретнуваат производителите, откупувачите и дестилариите. Саемот е отворен со отворање на црно вино „Отворен Балкан“ создадено од три сорти грозје од земјите членки на „Отворен Балкан“ - Македонија, Србија и Албанија

Виното „Оpen Balkan“ e направено од македонски „вранец“, српски „пробус" и од албанска „шазила". 

„Отворен Балкан покажува што значи интеграција, олеснет пристап, практична примена на политика на отворени врати и на добрососедство. Денеска тука ги поврзуваме нашите економии, отвораме нови пазари и пласмани, обезбедуваме простор за размена на нови идеи, технологии и пристапи за работа. Македонското вино е со светски познат квалитет, според последните рангирања Северна Македонија е втор најголем извозник на вино во регионот, а 29 најголем извозник на вино во светот. Трета година по ред извозот на вино од нашата држава е во пораст, и во количини и по вредност“, изјави Ковачевски.

Македонските винарии минатата година бележат зголемување од 19 проценти на извозот во споредба со 2020 година, а нивниот број е зголемен на 139, со просечно годишни производство од околу 100 милиони литри.

Овој саем, нагласи Ковачевски, е можност да воспоставиме и нова динамика во регионалните односи и да обезбедиме економски просперитет за нашите граѓани и компании.

„За првпат на еден меѓународен саем за храна, вино и туризам, со поддршка на својата држава присуствуваат претставници на 43 винарии и три дестилерии кои ќе се претстават со повеќе од 300 различни вина и ракии, а ќе присуствуваат и над десет производители на храна“, рече Ковачевски.

Ваков саем и толкав број на излагачи, нагласи Ковачевски, е можен само ако го правиме заедно и денеска сите тие имаат рамноправна шанса да ги претстават своите производи пред стотици илјади присутни и да остварат пласмани, пазари и контакти со присутните компании.

„За сите присутни компании ова значи отворање на нови шанси за деловни контакти на меѓународно ниво, отворени можности за нови пласмани и приливи на нови средства преку развој и проширување на производството и нови инвестиции“, изјави Ковачевски.

Македонските производители на храна, вино и туристичките капацитети, посочи Ковачевски на присутните посетители на Саемот, под мотото „Вкуси го животот" им порачуваат да вкусат македонско вино, македонска храна и македонска авантура.

Првиот меѓународен саем за вино, храна и туризам „Винска Визија на Отворен Балкан", се одржува во рамките на Самитот Отворен Балкан во следните четири дена во Белград, под покровителство на Србија, Македонија и Албанија.

На Саемот учествуваат повеќе од 330 изложувачи од 22 земји, а Македонија ќе ја претстави својата традиција, обичаи, карактеристичната кујна, музика и фолклор, како и обележјата и вредностите на сите други заедници кои живеат во земјата.

Во рамки на саемот „Винска визија на Отворен Балкан", ќе има дегустација на вина, а воедно ќе се одржи натпреварот „Трофеј на виното на Отворен Балкан" 2022 година. Саемот е одлична можност за поврзување на винските патишта на Балканот и пред високите гости и посетители како и отворање на нови можности за соработка, за обезбедување поголем извоз, откуп и нови пласмани, што позитивно ќе се рефлектира на развојот на домашната економија. На Саемот ќе се претстават и повеќе од десет производители на храна од земјава кои ќе се презентираат автентичните вкусови на македонската кујна.

Македонската туристичка понуда на Саемот за вино, храна и туризам во Белград, ќе биде претставена преку Агенцијата за промоција и поддршка на туризмот. Фокусот е ставен на македонскиот ено-гастро туризам (туризам базиран на вино и храна), националните паркови, природните и вештачките езера, заштитените подрачја од УНЕСКО, руралниот туризам и адреналинскиот туризам.

Како дел од промотивните активности на македонските производи, вината, храната и националните богатства интересни за туристите, претседателот на Владата Димитар Ковачевски ќе биде домаќин на „Македонската вечер", каде ќе присуствуваат претставници на бизнис заедниците и владите од Србија, Албанија и Македонија.

Во рамки на активностите во Белград ќе се одржи и традиционалниот лидерски политички самит на Отворен Балкан предводен од претседателот на Србија, Александар Вучиќ, премиерот на Македонија, Димитар Ковачевски и премиерот на Албанија, Еди Рама.

Предложеното законско решение се фокусира на аудиовизуелниот/радиодифузниот сектор, игнорирајќи ги последниве две децении на развој на дигиталниот домен и на интернет, со сите негови позитивни и негативни страни.

повеќе

Според последното истражување на организацијата ПИНА, базирано врз анкети направени со 103 новинарки, 24,1% од новинарките добиле закани за физичко насилство, а 19,5% и закани по животот.

повеќе