Мицевски: Буџетот што го скроија Заев и Ангеловска е расипнички и коруптивен

Зоран Заев и Нина Ангеловска го скроија најголемиот, најрасипничкиот, најкоруптивниот и  најнеразвојниот буџет во историјата на независна Македонија. Удираат по џебот на граѓаните, собираат пари за луксузирање, а капиталните инвестиции им се помали и од најлошите години, обвини денеска Никола Мицевски, координатор на пратеничката група на ВМРО-ДПМНЕ.

„Власта за 2020 година предвидува да потроши неверојатни 4 милијарди евра. Буџетот за идната година е поголем за 200 милиони евра од буџетот за оваа година, а сумата која се одвојува за капитални инвестиции и процентуално и номинално е помала од сумата која беше предвидена за оваа година. Наместо буџетот да придонесува за подобрување на квалитетот и продуктивноста на администрацијата, Заев и Ангеловска со овој буџет прават класичен поткуп за претстојните парламентарни избори, манипулирајќи ги граѓаните велејќи дека вложуваат во човечки капитал.

Исто така, слушаме нов поим во науката - инвестиции во човечките ресурси, во исплата на плати во државна администрација која не е намалена, туку уште се зголемува заради партиски цели, а овој буџет единствено треба да помогне во предизборниот период за потребите на СДСМ.

Ова не е ни приближно вложување во човечки капитал туку класичен пример за буџет кој што треба да служи за поткуп, уцени и корупција со гласачите“, рече Мицевски.

Според него, пред доаѓањето на власт ставката за капитални инвестиции изнесувала од 10 до 15% од буџетот, а сега минатогодишните 6,5% ги намалуваат на 5% од буџетот. Тоа, како што рече, е рамно на катастрофа.

„Додека парите за развој се намалуваат, се зголемуваат средствата во ставката стоки и услуги. Владата планира догодина да потроши 180 милиони евра повеќе на стоки и услуги, односно цели 835 милиони евра. Значи близу една милијарда евра фрлени низ ветер. Овие 835 милиони евра власта планира да ги потроши на тендери, привремени вработувања со цел изборен поткуп и исплата на патни трошоци.

Со новиот буџет нема средства за Чебрен и Галиште, ниту за ТЕЦ Неготино. Нема пари ниту за енергетски развој, ниту за нови проекти во секторот за користење на природен гас. Нема пари ниту за борба против загадениот воздух, а генерално на шкрги ќе дише Министерството за животна средина кое ќе добие под 1% од буџетот.

Оваа власт која дојде ветувајќи подобро образование, за идната година предвидува 17% помалку во буџетот за наука од оваа година. Значително се намалуваат и средствата за изградба на основни и средни училишта, како и за студентски домови. Екстра пари ќе нема ниту за здравството, а граѓаните и медицинскиот персонал нема да видат ништо ниту од нови, модерни и поскапи медицински апарати“, рече Мицевски, додавајќи дека овој буџет е расипнички и не води грижа за развојот на државата и идните генерации. 

 

Нашиот капацитет за справување со општи кризи е ограничен. Дали здравството е немоќно, или ние не можеме да се прилагодиме на промени?

повеќе

 За базата во Ново Село, Бугарија не добива ни долар за закупнина, а отворени се и бројни прашања за животната средина.

повеќе

Се поставува прашањето, дали треба да се жртвува слободата за сметка на жртвите кои се последица од вирусот, кој не можеме да го спречиме освен со строги санкции и мерки?

повеќе