Владин предлог пред Собранието

МАНУ не го дава името, Владата вели дека ќе мора да се прекрсти

Македонската академија на науките и уметностите e институција која е формирана од државата и се финансира од буџетот на државата, па според Преспанскиот договор државата презела обврска дека треба да користи друго име. Според Преспанскиот договор, придавката „македонска“ во овој случај треба да се усогласи со официјалното име „на Република Северна Македонија“. Од МАНУ велат „не“.

Владата неодамна до Собранието испратила предлог закон Македонската академија на науките и уметностите – МАНУ да се преименува во Академија на науките и уметностите на Република Северна Македонија. Откако мнозинството академици го отфрлиле овој предлог, Владата го повлекла од Собранието законот за преименување на институцијата.

И покрај ова, од Владата сметаат дека ќе мора да се најде решение за МАНУ која како државна институција, велат, е должна да го почитува Преспанскиот договор.

И за време на мандатот на академикот Таки Фити, како претседател на МАНУ, ова прашање било покренато, но било најдено некое решение академијата сепак да ја задржи кратенката, а официјалното име да биде Академија на науките и уметностите на Република Северна Македонија или на Северна Македонија – МАНУ. Овојпат Владата се обиде ова и да го озакони.

По потпишувањето на Преспанскиот договор повеќето државни институции го сменија името во склад со новото име на државата.

Со Законот за Македонската академија на науките и уметностите академијата е највисока и самостојна научна и уметничка установа во Република Македонија. Академијата е јавна установа од особено значење за Републиката.

Академиците писмено се обратиле до законодавниот дом и до Владата и побарале законот да биде повлечен.

МАНУ е првата државна институција која и официјално се спротивстави на промена на името и одби да го додаде зборот северна.

Претседателот на МАНУ Љупчо Коцарев во неколку наврати изјави дека е неопходна дебата за договорот од Преспа и за тој со Бугарија.

„Впечаток е дека состојбата, во која се наоѓаат денес многу институции и граѓани на Македонија, поради користењето на името Македонија и придавките што произлегуваат од тоа име, е грда, непријатна, одвратна, застрашувачка. Што ни останува нам? Се надевам дека нема да дозволиме, во 21 век, Библијата да биде цензурирана. Но, не само тоа. Се залагам за достоинствена иднина на сите, па така и на Македонците“, изјави Коцарев.