Не лицитира со датуми, но...

Ковачевски: Одлагање на преговорите со ЕУ остава простор за актери блиски до режимот на Путин

Премиерот Димитар Ковачевски не сака да лицитира со датуми за одржување на ветената меѓувладина конференција за почеток на преговорите и вели дека никогаш не го споменал јуни, но предупредува дека секое одлагање го зголемува скептицизмот во земјата и им остава простор на актери блиски до режимот на Владимир Путин.

„Неотпочнувањето на преговори со Република Северна Македонија дава лош сигнал, бидејќи ние веќе имаме четири позитивни извештаи од страна на Европската комисија за нашиот напредок во усогласувањето со ЕУ. Тоа дава лош сигнал како за нас, така и за цел регион“, вели Ковачевски во интервју за МИА.

Тој потсети дека поддршката за ЕУ е сѐ уште на исклучително високо ниво, над 68 проценти, но неисполнувањето на одржувањето на првата меѓувладина конференција го зголемува скептицизмот кај одредени групи, што е нормално во еден таков долг процес и не е добро.

„Постојат и трети држави коишто не сакаат да ја видат РСМ како дел од ЕУ и коишто финансираат различни групи па и политички партии. Ние имаме политички партии со антиевропска и анти-НАТО определба коишто се класично популистички во државата, никогаш не предложиле една остварлива мерка, меѓутоа се потхранети од едни такви центри надвор од државата и коишто со такво финансирање успеваат да креираат одредено јавно мислење коешто е спротивно на стратешките определби на доминантниот дел на населението и спротивно на сите владини партнери, а тоа е полноправно членство во Европа. Бидејќи да не заборавиме ние сме најновата членка на НАТО, каква што станавме благодарение на тешките одлуки, меѓутоа сега гледаме колку е значајно да се биде земја членка на НАТО со оглед на тоа што безбедноста на државата се гарантира од најголемиот безбедносен и одбранбен сојуз во светот“, изјавил Ковачевски.

Македонија, според него, се надева на нов импулс во преговорите со соседна Бугарија, каде новиот премиер изрази волја за надминување на несогласувања, но и самиот се справува со домашен отпор.

Ковачевски во Брисел се сретна и со премиерот и со претседателот на Бугарија, Кирил Петков и Румен Радев, дојдени за бројните самити кои се одржуваат оваа недела за Украина и вели дека градењето доверба помеѓу двете страни е поважно од лицитирање со датуми.

„Јас јуни никогаш го немам спомнато и не се врзувам за датуми, затоа што треба да имаме решение кое се заснова прво на европските вредности, а второ до коешто ќе се дојде низ комуникација, а засновано на принцип на меѓусебна почит, прво помеѓу политичарите, второ помеѓу институциите во двете држави и трето на зачувување на достоинството на граѓаните на двете држави. Само такво решение може да претставува добра основа за, прво, отпочнување на преговорите и второ градење на меѓусебна доверба на две соседни држави коишто треба во светот да претставуваат пример за економска и секаков вид на соработка за напредување на стандардот на граѓаните“, вели Ковачевски.

Во однос на ЕУ санкциите со кои Македонија е целосно усогласена, а можат да ѝ нанесат штета на македонската економија, премиерот посочува дека постојат веќе програми за помош од пред војната, но и дека Владата е во постојана комуникација со ЕУ. Дали тоа значи дека Македонија ќе може да добие некакви компензации, останува неизвесно во моментов.

„Ние имаме на дневно ниво контакти со релевантните секретаријати и сектори во ЕУ и тоа пред сѐ се однесува на финансиската помош, бидејќи министерството за финансии е во постојана комуникација и со ЕИБ и со ЕЦБ. Детали не можам да ви откријам бидејќи се работи навистина за разговори на техничко ниво во однос на финансирањето на надворешниот долг што го имаме бидејќи секогаш постојат повеќе опции за финансирање на задолжувањето и прва опција секако ни е прво ЕУ каде што имаме пристап на дневно ниво. Во однос на снабдувањето со електрична енергија се разговара за заедничко купување и за сите тие стратегии коишто ги развива ЕУ ние сме информирани уште пред нивното правење, и ние веќе ги имаме тие стратегии. Ако погледнеме и проектот во Александруполи, таму учествуваат Република Грција којашто е дел од ЕУ, Република Бугарија којашто е дел од ЕУ и ние коишто сме на пат за влез во ЕУ“, вели Ковачевски.

 

Со францускиот предлог на патот кон ЕУ македонскиот народ ќе ја изгуби историската тапија врз сопствената свест и наследство.

повеќе

Ако пак се натури овој бесмислен консензус на Франција, кој ги признава сите емоции на Бугарија, тогаш оваа неспособна власт ќе не одведе подлабоко од сегашниот амбис.

повеќе

Во новите предлози се направени само формални, но не и суштествени промени, во однос на претходниот предлог (кој Владата го нема објавено).

повеќе