Премиерот со одговор до опозицијата

Ковачевски: Ако има ВМРО-ДПМНЕ понуди за енергенси да ги достави до ЕСМ или Економија

Во врска со пратеничко прашање од редовите на ВМРО-ДПМНЕ во кое беше изнесено дека партијата има „индикативни понуди“ од Западна Европа со поволни цени за набавка на мазут и гас за домашните централи за производство на струја, за што на брифинг со новинари говореше и партискиот лидер Христијан Мицкоски, премиерот Димитар Ковачевски порача: Понудите може да се достават до ЕСМ, во мојот кабинет не се доставуваат понуди“.

Премиерот Димитар Ковачевски денеска и порача на ВМРО-ДПМНЕ контактите за набавка на евтина струја да ги достави до АД ЕСМ или до Министерството за економија.

Тоа се адресите до кои опозициската партија треба да се обрати ако навистина има такви контакти и ако сака да помогне, рече Ковачевски, одговорајќи на пратеничко прашање. Во неговиот кабинет, како што истакна, нема архива за прибирање понуди, ниту, пак, може да доѓаат пратеници или министри со некакви контакти.

„Има отворени повици, јавно објавени и секогаш победува најдобрата понуда“, потенцира премиерот.

Премиерот подвлече дека секоја помош во овие услови е добредојдена и ќе се почитува. Воедно повтори дека на 15 октомври ќе почне грејната сезона во Скопје и дека парно ќе има.