Искуства од Србија

Граѓаните ќе можат на веб-страниците да поставуваат прашања за Владата и министрите

На почетокот на следната година веб-страниците на Владата и министерствата треба да бидат редизајнирани и унифицирани во насока на поголема транспарентност и отчетност и интерактивност со граѓаните. Министерот за информатичко општество и администрација Дамјан Манчевски денеска најави дека во примената на новиот концепт, што е дел од реформите на администрацијата преку дигитализација на процесите, ќе се користат искуства на Србија.

Со Меморандумот за соработка што Манчевски го потпиша со директорот на Канцеларијата за информациски технологии и електронска управа во Владата на Република Србија, Михаило Јовановиќ, се предвидува размена на знаење и искуства од дигитализацијата на српската јавна управа во изминатите две години.

„Колегите од Србија воведоа конкретен механизам за комуникација со граѓаните кој можат преку веб-страницата на Владата да упатат конкретно прашање и има конкретни рокови во кои мора да добијат одговори од соодветната институција“, рече Манчевски, наведувајќи пример за функционалноста на концептот наречен „Единствено веб решение”.

На овој концепт, во последните неколку месеци работела работна група формирана од претставници на институциите, Националниот совет за ИКТ, предводен од Владо Цветковиќ од Србија, како и претставници номинирани од Дигиталниот форум.

Како што дополни министерот, на многу едноставен и лесен интерактивен начин граѓаните веднаш ќе добиваат одговори од институциите, а има и јавна статистика на бројот на одговори и времето што било потребно да бидат доставени. 

„Меѓуресорска група веќе работи на концептот, ова е финална фаза во која ни требаат овие искуства, во текот на есента ќе почнеме со јавни набавки и на почетокот на 2020 година ќе имаме целосно редизајнирани веб-страници“, рече Манчевски.

Веб-страните на нашите институции, според него, моментално се со застарен дизајнерски пристап, нефлексибилни, се фокусираат само кон вести и соопштенија, не се сервисно ориентирани и нудат многу малку услуги за граѓаните. Платформите што се користат за веб-страниците некаде се постари од 10 години, најчесто не ги исполнуваат современите стандарди за безбедност, не се пристапни за лица со попречености и не дозволуваат унапредување и посериозно редизајнирање.

„Во иднина веб-страниците нема да информираат само за активностите на министрите, како што е тоа случај сега, туку ќе ги нудат потребните информации за услугите кои им се потребни на граѓаните, на многу поедноставен начин. Ќе ја промовираат земјата и ќе привлекуваат туристи. Ќе ги нагласуваат бизнис-придобивките кои ги нуди Владата, како би привлекле повеќе инвеститори во Северна Македонија“, изјави Манчевски, потенцирајќи дека менувањето и унифицирањето на веб-страниците на Владата и министерствата е многу повеќе од менување на нивниот изглед и подобрување на нивните функционалности. Се менува целиот начин на којшто ќе комуницираат со граѓаните и ќе објавуваат информации.

Јовановиќ, од своја страна, кажа дека Меморандумот за соработка во дигитализацијата е продолжение на активностите во таа насока од дигиталните самити за Западен Балкан, што се одржаа во Скопје и во Белград.

„Програмата и концептот за дигитализација што премиерката Ана Брнабиќ го постави во приоритетите на Владата на Република Србија за две години доведе до развој на нови системи за електронска управа. Веќе забележуваме дека државите од регионот ги препознаа значењето и можностите по електронски пат да се направи трансформација на јавните управи во ефикасен сервис во којшто граѓаните и стопанството се во центарот на вниманието“, рече Јовановиќ и порача дека регионот ќе се развива само со размена на знаења, искуства и идеи базирани на дигитализација помеѓу државите.

Како што најави Манчевски, следен чекор во соработката во областа на дигитализацијата со Србија е потпишување договор за меѓусебно признавање на електронски сертификати, што се планира за почетокот на септември.

Помина времето кога политиката беше „шаховска борба“ на политичките актери, која неретко се одвиваше далеку од очите на јавноста и беше доста неразбирлива за обичниот гласач. 

повеќе

Државата треба повеќе да се вклучи во промовирање на младинско претприемништво како економска активност која би помогнала за намалување на невработеноста.

повеќе

Без оглед на политичката заднина на случајот за изнудување, владата во Скопје мора да се фокусира на темелна истрага наместо на ограничување на штетата.

повеќе