Прес-конференција на ВМРО-ДПМНЕ

Ѓорчев: Во Скопје починати од ковид-19 колку во земјотресот од 1963 година

Црни и катастрофални се бројките за починати луѓе од ковид-19 во Македонија, 3.200 мртви во земјава од почетокот на епидемијата, а само во Скопје таа бројка изнесува 1.020, речиси исто толку колку што загинаа во катастрофалниот земјотрес во 1963 година, рече на прес-конференција Владимир Ѓорчев, член на Извршниот комитет на ВМРО-ДПМНЕ. Тој ги обвини како неспособни да се справат со епидемијата премиерот Заев и министерот Филипче и побара оставки.

„Македонија ги живее најтажните и најцрните моменти од своето постоење како држава. Македонија денеска има 3.200 мртви, 3.200 починати луѓе. Но, кога ќе ги погледнеме бројките по градови стануваме свесни за размерите на ужасот и катастрофата која што ни се случува.Во Скопје веќе имаме 1.020 починати луѓе. Бројките се речиси исти како скопскиот земјотрес, тоа е ужасот и трагедијата која што ни се случува“, рече Ѓорчев.

Тој ги наброја и Битола со 156 починати лица, Охрид со 138 починати, Прилеп 264, Велес 112, Штип близу 100, во Струмица 115, Кочани 50 и Куманово со 213 починати.

„Ова не се само бројки, ова се семејства, ова се луѓе, ова се судбини. Ова се црните и катастрофалните бројки од неспобноста на Зоран Заев, Венко Филипче и нивните министри. Време е за одговорност и време е за оставка“, рече Ѓорчев.