ЕУ донираше уште осум респиратори

Донацијата од Европската Унија од уште осум уреди за механичка вентилација (респиратори) и различни единици на лична заштитна опрема, денеска беше предадена како поддршка за земјава во справувањето со пандемијата предизвикана од ковид-19.

Со денешната донација и претходно донираните 12 респиратори се заокружува бројката од 20 респираторни машини кои се набавени дел од 4 милиони евра кои што Европската комисија ги стави на располагање за итните медицински потреби на земјата за справување со ковид кризата. Помошта вклучува и десет перфузори и редуктори за кислород, и огромна количина на заштитна опрема како 750 илјади хируршки ракавици, и десетици илјади заштитни скафандери, наметки, очила и маски кои дел веќе се кориостат од здравствените институции.

На настанот на кој присуствуваа евроамбасадорот Самуел Жбогар и министерот за здравство Венко Филипче, националниот координатор на странска помош во земјава и вицепремиер за европски прашања Бујар Османи истакна дека помошта е обезбедена преку широка соработка со ЕУ и земјите членки, а особено е важно што доаѓа во време кога се соочуваме со нов бран на ширење на коронавирусот.

„Факт е дека при справување со пандемијата секоја земја мора да најмногу да се потпре на сопствените капацитети и на одговорното однесување на сопствените институции и на сопствените граѓани. Но добро е да се знае дека во справувањето со оваа криза и со сите други предизвици никогаш нема да бидеме сами, туку секогаш ќе ја имаме поддршката и ќе бидеме дел од заедничкиот европски одговор во овој период. Важно е и што ние се наоѓаме пред самиот старт на преговорите со ЕУ и по прв пат чувствуваме како да сме дел од внатрешното прашање на ЕУ и значат солидарност и поддршка за земјата кога ви е најпотребна“, рече Османи.

Тој се заблагодари на ЕУ за помошта, како и на Канцеларијата на УНОПС во земјава која со администрацијата на СЕП овозможија непречена набавка и транспорт на опремата во земјава.

Евроамбасадорот Жбогар истакна дека со донацијата вредна 4 милиони евра ЕУ продолжува континуирано да ја покажува солидарноста со земјава на дело, а веќе се најавени и 40 милиони евра за социо-економското опоравување на земјата и 160 милиони евра како заем за кој веќе е постигната согласнст со Владата. Исто така, околу 330 илјади евра од проекти кои се во тек на реализација ќе бидат пренаменети за да одговорат на потребите за справување со коронавирусот. Тој упати и апел до граѓаните за почитување на превентивните мерки.

„Имате навистина посветен медициснки персонал во земјата, имате и посветени партнери кои се тука за да ви помогнат со потребната медицинска опрема. Но ни треба и посветена јавност, посветени граѓани кои ќе се однесуваат во согласност со насоките на медицинските власти – да носат заштитни маски за лице, почесто миење на раце и да држат социјална дистанца, за да им помогнеме на медицинскиот персонал, за да можеме да излеземе од карантин и да го планираме летото“, рече Жбогар.

Според министерот Филипче, од ЕУ беа едни од првите кои понудија помош и таа пристигна кога е најмногу потребна, а тоа е уште еден доказ дека ЕУ е наш најголем партнер.

„Овие осум респираторни мшини и претходно донираните 12 кои се веќе распоредени во здравствените установи веќе се користат за третман на пациенти, а таму каде нема пациенти со ковид и за друга индикација. Еден сериозен чекор напред во смисла на зајакнување на нашиот здравствен систем посебно каде е најпотребно, а тоа се одделенијата за интензивна нега“, рече Филипче и додаде дека со следниот проект кој го понудила ЕУ ќе бидат опремени сите одделенија за интензивна нега во болниците ширум државата.

Европската Унија за земјава вети поддршка од четири милиони евра за набавка на итни медицински материјали за заштита и лечење на ковид-19. За нешто повеќе од еден месец, ЕУ во соработка со UNOPS – Канцеларијата на Обединетите нации за проектни услуги и во координација со Секретаријатот за европски прашања веќе достави 12 уреди за механичка вентилација и околу еден милион единици на различна медицинска опрема и единици за лична заштита за медицинските работници. Од Делегацијата на ЕУ најавија дека до крајот на месецов ќе ги испорачаат сите преостанати првично планирани производи и покрај ограничената расположливост и високата побарувачка за специјализирана медицинска опрема и материјали за лична заштита.  

Зголемувањето на парите за финансирање на партиите не помагаат во поттикнувањето на политичката активност на граѓаните, туку веројатно и делуваат контрапродуктивно, зголемувајќи ја недовербата во партиите и политичарите.

повеќе

За помалку од еден месец по олеснувањето на рестриктивните мерки, Косово се соочува со нагло зголемување на бројот на случаи со ковид-19, 

повеќе