Видео-конференција на Советот на Јадранско-јонската иницијатива

Димитров: Само преку координиран пристап ќе ги пребродиме последиците од кризата со ковид-19

Министерот за надворешни работи Никола Димитров учествуваше на видео-конференција на Советот на Јадранско-јонската иницијатива и министерски состанок на Стратегијата на ЕУ за Јадранско-јонскиот регион (EUSAIR), чиј главен фокус беше координацијата во справувањето со последиците од пандемијата со ковид-19.

Како што соопшти Министерството за надворешни работи, министрите разговарале за тековната и идна фаза за справување со социо-економските последици и останатите предизвици предизвикани од ковид-19 вирусот. Сите учесници се согласиле дека оваа пандемија претставува закана без преседан за економскиот раст на земјите членки на иницијативата, од ЕУ и од регионот на Западен Балкан.

„Истовремено кризата докажа и дека солидарноста, соработката и координацијата на билатерално, регионално и меѓународно ниво, се клучни за отстранување на таквите закани и нивните последици“, заклучиле учесниците на конференцијата.

„Претставува задоволство што на денешнава конференција во рамки на овој важен форум за регионална соработка и промоција на ЕУ интегративните процеси, кон кој пристапивме пред две години, е потенцирана и убавата симболика со одлуките на Советот на ЕУ во март годинава за почеток на пристапни преговори со Северна Македонија и Албанија, чие натамошно ефектуирање ќе биде во фокус и на претстојното словенечко претседателство со Иницијативата. Во однос на предизвиците со пандемијата кои сите нас разбирливо нè преокупираат, мислам на сите ни е јасно дека само преку координиран пристап проткаен со солидарност, соработка и несебична размена на знаења и добри практики ќе ги пребродиме последиците од иницијалната криза“, каќал Димитров.

Министрите заклучиле дека главен приоритет кој останува е минимизирање на последиците врз здравствените системи и здравјето на граѓаните, но истовремено и рестартирање на економијата и адресирање на социјалните импликации од економскиот пад, предизвикан од пандемијата.

„Во овој контекст, потребна е интензивирана и продлабочена соработка за утврдување на заемни решенија со цел безбедно отворање на границите и слободно патување на граѓаните, непречено одвивање на транспортот, зајакнување на трговијата и отворање на туристичките капацитети, преку размена на најдобри практики и почитување на здравствените протоколи“, се додава во соопштението од МНР.

Инаку министерската видео-конференција е дел од редовните годишни состаноци организирани од страна на претседавачите со иницијативата (Србија), при што од оваа година за прв пат учествуваше и Македонија која на 2 април 2020 год. официјално стана деветтата земја членка на Стратегијата на ЕУ за Јадранско-јонскиот регион (EUSAIR).

„Новото нормално“ неизбежно со себе ќе носи неизвесност и страв бидејќи заканата од вирусот наѕира во позадина и не може да се искорени.

повеќе

„Шарената револуција“ беше енергија и граѓански порив за промени. Малку застранивме.

повеќе