Имено, судијата во кривичната постапка во која Трамп е обвинет за фалсификување деловни документи со цел да ги прикрие наводните плаќања на порно актерката Сторми Даниелс, му се закани на поранешниот претседател со затворска казна затоа што повеќепати ја прекршил забраната да зборува за случајот.
„Искрено, нашиот Устав е многу поважен од затвор“, рече Трамп во ходникот на судот во Менхетен. „Не може ни да се споредува. Подготвен сум да ја направам таа жртва“, рече тој.
Трамп брзо ги искористи пресудите за непочитување на судот за да добие поддршка во предизборната кампања, и од гласачите и од донаторите.
Во е-поштата за собирање средства испратена пред да оди на суд, Трамп рече дека „либерален судија во Њујорк“ му се заканил дека „ќе го фрли во затвор“ и дека „го сака во лисици“.
Неговата кампања ги повика приврзаниците да „Застанат со Трамп“ и да упатат донации на заедничкиот комитет за собирање финансиски средства започнат оваа пролет.
Казните за непочитување на судот исто така му даваат на Трамп нов начин да го критикува американскиот правосуден систем, за кој вели дека е нефер и пристрасен, објаснува Политико.