Инспекциски совет

Затворени 8 угостителски објекти во Скопје, Куманово и Гостивар, не ги почитувале протоколите за работа

Во периодот од 14 до 20 декември седум инспекциски служби извршиле вкупно 5.858 контроли и надзори, при што Државниот санитарен и здравствен инспекторат (ДСЗИ) во тој период извршил вкупно 98 надзори врз основа на кои изрекол 10 решенија.

ДСЗИ којшто е задолжен да издава решенија за изолација на заболени лица од коронавирусот, како и на лица кои биле во контакт со заболено лице, издаде и 9.065 решенија за изолација и домашно лекување, информираше на денешната прес-конференција претседателката на Инспекцискиот совет, Магдалена Филиповска-Грашкоска. Според неа, во истиот овој период инспекторите од Државниот пазарен инспекторат извршиле 4.338 контроли и 546 надзори поврзани со почитувањето на здравствените протоколи за отворање и работа на кафетерии и угостителски објекти, но исто така поврзани и со голем број на други материјални закони по коишто постапува овој Инспекторат.

При спроведените надзори од страна на пазарните инспектори изречени се 39 прекршочни пријави, 58 решенија за констатирани неправилности, како и 49 прекршочни платни налози. Од вкупниот број решенија, осум се донесени поради непочитување на Законот за заштита на населението од заразни болести и протоколот за работа на угостителски објекти кои се однесуваат за: по три угостителски објекти во Скопје и во Гостивар и за два угостителски објекти во Куманово во кои не се почитувало работното време или ограничувањето до четири лица на една маса.

„Во сите случаи е изречена забрана за вршење на дејноста, односно истите се затворени за работа, а дополнително се изречени и соодветни прекршочни платни налози. Во истиот овој период Инспекторатот за транспорт изврши 53 надзори, при што за непочитување на материјалните закони изречени се 11 прекршочни пријави и осум решенија. Од вкупно спроведените надзори, 23 се извршени согласно Законот за заштита на населението од заразни болести, при што се изречени три прекршочни пријави поради непочитување на протоколите за превоз на патници и тоа една прекршочна пријава за превоз на патници во Ресен и две прекршочни пријави за превоз на патници на граничен премин Деве Баир“, рече Филиповска-Грашкоска.

Таа информираше и дека Државниот инспекторат за труд во изминатите седум дена извршил вкупно 450 надзори во правни субјекти на територијата на целата држава со фокус на почитување на здравствениот протокол за превентивни мерки за сите работни места. Притоа, овој Инспекторат изрекол 12 решенија и пет прекршочни платни налози кои се однесуваат на утврдени неправилности од областа на работните односи и безбедноста и здравје при работа.

Во однос на Законот за заштита на населението од заразни болести Филиповска-Грашкоска рече дека трудовите инспектори во три случаи констатирале прекршување на протоколот за превентивни мерки на сите работни места за што изрекле соодветна мерка.

„Агенцијата за лекови и медицински помагала, пак, во истиот овој период спроведе 28 надзори во аптеки на територијата на целата држава и притоа се контролирани формираните цени за заштитни средства од корона каде што не се утврдени неправилности, но се издадени две решенија согласно Законот за лекови и медицински помагала. Агенацијата за храна и ветеринарство, пак, изврши 303 надзори, при што издадени се девет решенија, 14 едукации и шест прекршочни налози по основ на нерегистриран оператор, непостапување по наредени мерки, неизвршени здравствени прегледи и неправилно складирање, чување и означување на производи“, рече Филиповска-Грашкоска.

Таа нагласи дека Државниот инспекторат за животна средина во текот на минатата недела извршил вкупно 42 надзори и издал три решенија за констатирани неправилности, два прекршочни платни налози и една прекршочна пријава. Дополнително од страна на Државниот инспекторат за животна средина е поднесен и предлог за одземање на Б-интегрирана дозвола за непочитување на условите, а генерално утврдените неправилности од страна на овој Инспекторат се однесуваат на неплатени надоместоци за водно право, горење отпадно масло во автосервиси и непочитување на услови во издадена Б-интегрирана дозвола.

Филиповска-Грашкоска апелираше до сите граѓани и стопанственици да бидат свесни при прославувањето на празниците кои доаѓаат и да ги почитуваат протоколите и препораките за спречување на ширење на коронавирусот. Исто така рече дека инспекциските служби ќе продолжат да работат со полн капацитет и во следниот период и неселективно и навремено ќе ги санкционираат сите кои преку непочитување на протоколите и мерките го загрозуваат јавното здравје и здравјето на граѓаните.

 

Јане бил свесен дека деновите му се одброени и отворено говорел за тоа. Знаел дека многумина имаат причина да го ликвидираат, дека им пречи во остварувањето на нивните „повисоки цели“.

повеќе

Во македонскиот интернет простор постојано се појавуваат и гаснат портали, со што засекогаш исчезнуваат и објавените содржини.

повеќе

Пред неколку недели се наврши една година од почетокот на пандемијата. Ковид-19 ги разоткри системските проблеми во здравствениот систем и другите институционални гранки на Косово.

повеќе