„Пејпер Мил“ прекина со работа, се бара решение за вработените

По решението на Инспекторатот за животна средина фабриката „Пејпер Мил“ од Кочани да работи со користење на метан како единствен енергенс управата на компанијата одлучи да го прекине производствениот процес на неопределено време, а 120-те вработени се известени дека не треба да доаѓаат на работа и во тек се правни консултации за понатамоно решавање на нивниот статус, согласно законите.

Од „Пејпер Мил“ велат дека до донесување на конечните решенија статусот на вработените останува ист, односно тие остануваат вработени во фабриката, со целосно исполнување на законските обврски кон нив, исплата на плата и придонеси.

Според генералниот директор на „Пејпер Мил“, Јулијан Даскалов, одлуката за прекин на работењето на фабриката е донесена по обемните анализи за состојбата направени од страна на управата, а по последното решение добиено од Инспекторатот за животна средина.

„Со жалење констатираме дека решението на Инспекторатот е базирано на резултатите на едно од десетиците направени мерења од страна на повеќе референтни и акредитирани домашни и странски лаборатории. Резултатите на единствената лабораторија која детектираше драстично отстапување, а кои ги уважи Инспекторатот доведоа до тоа што на фабриката ѝ се наложи одвивање на производствениот процес само на метан, што во услови на глобална економска криза не обезбедува одржливост во работењето на компанијата“, вели Даскалов.

Тој додава дека одлуката за прекин на работењето на неопределено време воопшто не била лесна со оглед на вложените инвестиции од седум милиони евра во изминатите пет години, инвестициите во тек – нарачаната опрема за дополнително унапредување на технолошкиот процес која е планирано да пристигне кон средината на февруари и секако судбината на 120 семејства кои остануваат без својата егзистенција.

Инаку, „Пејпер Мил“ е единствената фабрика во земјава која рециклира хартија, која, ако на почетокот целосно увезуваше хартија за рециклирање, денеска речиси 100 отсто откупува и рециклира хартија од и во нашата држава. Со прекинот на работењето останува неизвесен откупот на хартија за рециклирање во земјата, а фабриката се соочува и со загуби по основ на унапред договорените двомесечни нарачки за извоз на околу 2.500 тони во регионот.

„Навистина е нејасна одлуката на Инспекторатот со која нé принудуваат целиот процес на производство да го префрлиме на метан, кој патем не е достапен во земјава, па мораме како компресиран гас да го увезуваме чија цена за 5 години порасна речиси двојно. Не јасно е зошто Инспекторатот за животна средина одбира да уважи мерења на само една лабораторија, не земајќи ги предвид и игнорирајќи ги резултатите добиени од референтни и акредитирани лаборатории од ЕУ, што е спротивно на конвенциите кои ги има потпишано Република Северна Македонија со ЕУ“, вели Даскало, додавајќи дека од самиот почеток фабриката работи целосно транспарентно и согласно законите, максимално посветено на соработка со институциите и локалната самоуправа.

Фабрика за хартија во Кочани е една од најстарите фабрики во Македонија, основана уште во 1963 година. Во составот на „Унитрајд Кластер“ со седиште во Бугарија е од 2016 година. Фабриката поседува А ИСКЗ дозвола од Министерство за животна средина, како и неколку сертификати за квалитет и екологија. Капацитетот е доволен за рециклажа на целата картонска отпадна хартија на ниво на земјата. Моменталниот капацитет е 14.400 тони годишно, а веќе се направени проекти за тројно зголемување на овој капацитет.

 

Во САД и некои други земји, припадниците на загрозените расни и етнички малцинства имаат пократок животен век од просечниот, и поради тоа не се доволно застапени меѓу оние за кои најмногу се очекува дека ќе починат од ковид-19.

повеќе

Предвидувањата за тоа дека ќе дојде денот кога Бугарија ќе ги искористи пасошите кои Софија така лесно им ги даваше на македонските државјани почнуваат да се остваруваат.

повеќе

Реакцијата на семејството и блиските во однос на пандемијата е пресуден фактор кој влијае на емотивната состојба, размислувањата и однесувањето на младите.

повеќе