Средба на директорите на железниците на Македонија и Бугарија

Локвенец најави дека има пари да се почне со изградба на железница кон Бугарија

Конечно, по 30 години, пругата кон Бугарија станува реалност, обезбедени се 165 милиони евраи  привршува тендерската постапка за избор на изведувач, изјави директорот на македонски Железници Хари Локвенец на средбата со бугарскиот колега Красимир Папукчиски. Локвенец искажа очекување за три до четири месеци да се гради. Папукчиски вели дека од бугарска страна  се спроведува проект за техничка помош за подготовка на проектот за модернизација на железничката линија Софија – Перник – Радомир – Ѓуешево – граница со Македонија,

Интензивирање на изградбата на железничката пруга Софија – Скопје, најавија денеска генералниот директор на Јавното претпријатие за железничка инфраструктура „Железници на Република Северна Македонија" Хари Локвенец и неговиот бугарски колега Красимир Папукчиски, генерален директор на Националната компанија за Железна и патна инфраструктура (ДК НКЖИ) на Република Бугарија на состанок во  просториите на македонски „Железници“. На средбата беа и претставници на делегацијата на Европската Унија во Скопје кои дадоа силна поддршка за реализација на проектот и продлабочување на инфраструктурната соработка.

Потоа, заедно го посетија градилиштето, делот од Коридорот 8, Режановце, првата делница од Куманово до границата со Република Бугарија.

„Конечно, после речиси 30 години, железничката пруга за поврзување на Северна Македонија и Бугарија станува реалност. Добрите намери со кои беа поплочени повеќе најави досега, сега се преточени во конкретни, реални и најважно од сѐ – остварливи цели. Реалност, затоа што парите се обезбедени, вкупно 165 милиони евра. Реалност, затоа што имаме комплетно готов проект и затоа што привршува тендерската постапка за избор на изведувач. Реалност, затоа што следува градба на пругата оваа 2021 година. И конечно реалност, затоа што овој проект го придвижуваме заедно со нашите партнери од Бугарија. Тендерот е распишан, со изборот на изведувач започнува тридецениската желба да се реализира. Очекувам за 3-4 месеци овде, веќе да се гради. За важноста на овој проект за нашата земја, за граѓаните, за стопанството, за бизнисот е зборувано многупати. Тој е дел од Коридорот 8 и железничкото поврзување на нашите две земји е взаемен влог во европската агенда за поврзување на целиот регион. Затоа денеска со мене е мојот колега од Бугарија. Ги засукавме ракавите и заедно, реалноста за која што денеска зборуваме да ја оствариме, рече Локвенец.

„Овде, сите сме свесни за нашата одговорност во однос на реализацијата на Паневропскиот транспортен Коридор 8, којшто ќе го поврзе Јадранското море со Црното Море преку Албанија, Северна Македонија и Бугарија. Знаете дека во моментов во ДП НКЖИ се спроведува проект за техничка помош за подготовка на проектот за модернизација на железничката линија Софија – Перник – Радомир – Ѓуешево – граница со Република Северна Македонија, којашто е дел од главната мрежа и делумно поминува долж Коридорот Ориент-Источен Медитеран. Инвестицискиот проект предвидува изградба на железничка магистрална пруга за опслужување на населението, домашниот и меѓународниот товарен сообраќај. Овој проект ќе обезбеди оперативна компатибилност на инфраструктурата, опремата, системите за управување, експлоатација и безбедност, како и поврзување со европските железнички мрежи преку примена на унифицирани стандарди и во согласност со барањата на Трансевропската транспортна мрежа. Во моментов, железничката линија Софија – Перник – Радомир – Ѓуешево има вкупна должина од 139 километри. Брзината во делот варира од 70 до 100 километри на час, со одредени ограничувања од 40 до 75 километри на час. По спроведувањето на проектот очекуваме брзината да достигне 130/160 километри на час. Да си посакаме плодна работа и да се потсетиме дека при изградбата на железничките пруги нашите предци знаеја дека градат историја“, рече Папукчиски.

Алчноста за максимизирање на површината на градење ја помина „црвената линија“. Градот полека ја сече гранката на која седи.

повеќе

Пристигна барањето од етничкиот албански фактор во политиката за тоа да има промена во химната, знамето и грбот на државата.

повеќе

Доколку најмоќните луѓе во земјата (вклучително и претседателот Милановиќ) не престанат со вербалните напади и притисоци врз новинари и медиуми, се плашам дека Хрватска ќе појде по стапките на Унгарија, Полска и Словенија во однос на (не)слободата на медиумите, што секако не е европски, туку автократски пат.

повеќе