Во МНТ

Премиера на претставата „Макбет“, вонвременска тема за болната амбиција за власт

Македонскиот народен театар утревечер премиерно ќе ја изведе претставата „Макбет" во режија на Нела Витошевиќ, што ќе биде и прво поставување на оваа Шекспирова трагедија во продукција на МНТ. Премиерата е од програмата на театарот за 2018-та, но се одложи поради доцнење на финансиите и трипати беше презакажувана.

Витошевиќ ја направи и адаптацијата на текстот според препевот на Богомил Ѓузел. Клучна тема е амбицијата за власт и самодеструктивноста на човековата природа што, според режисерката, е и вонвременска тема, зашто она за што  Шекспир пишувал пред пет века, алудирајќи  на настани во тогашна Англија, се препознава и во денешниот либерален капитализам – личниот интерес и желбата за брз напредок се исти како и  борбата за престол во која целта ги оправдува средствата. За својата драма англискиот драматург искористил реален лик кој владеел 18 години во Шкотска во 11 век, но на својата приказна Шекспир ѝ дал надреалност со ликовите на трите вештерки кои имаат важна улога во драмата.

„Макбет“ е култно дело на Шекспир кое ме интересираше уште од студентските денови. Отсекогаш ме интригираше тоа што драмата е на подеднаков начин и психолошка и политичка. Таа зборува за една болна политичка амбиција за власт која главните ликови ги носи во психолошки распад. Ненаситноста за власт расте и таа води кон тиранија. Тоа им се случува на главните ликови, Макбет и Леди Макбет. Нивната преголема амбиција ги носи во пропаст и се дават во морето од крв што ќе пролеат од нивните жртви. Главните ликови на крајот умираат поради грижата на совест, рече Витошевиќ.

Нагласи дека „Макбет“ е тешка тема, најголем проект што досега го работела и со најголем буџет, околу 1,8 милион денари. По 12 години занимавање со театар првпат, рече, добива адекватна можност да сработи претстава со која ќе покаже што знае и  до која фаза стигнала како режисер.

Сашко Коцев, кој го игра насловниот лик, рече откако ја добил поканата се преиспитувал  дали е подготвен за Макбет.

„Амбицијата го победи Макбет и нарави страшно дело. Секоја чест на човек што може тоа да го направи и така да стигне горе, без никаква  грижа на совест. Тоа не е човек. Нашиот Макбет  не можевме така да го направиме. Сакав да му дадам човечка димензија, одговорност и грижа на совест“, истакна Коцев.

За среќа, додаде актерот, за време на подготовките не им се случеле лични несреќи, што е мит кога се поставува  „Макбет“, освен што театарот во земјава,  рече, е на маргините, немаме министер за култура, а првите пари за продукцијата стигнале неодамна и костимите и сцената ги добиле пред само неколку дена.

Неговата сопруга во претставата, Леди Макбет, ќе ја игра Драгана Лошкова, која на прашањето од каде потекнува нездравата амбиција на нејзиниот лик, рече тоа не е напишано во текстот но  претпоставува дека е поради духовна фрустрираност.

„На едно место во текстот се спомнува дека тие не се оствариле како родители, па ние тоа го зедовме како претпоставка. Веројатно, во една фаза кога човек не може да се реализира како родител или духовно да се реализира, тоа раѓа фрустрација или комплекс. Ако не се освести за тоа, веројатно развива некаква нездрава амбиција“, рече Лошкова.

 Во „Макбет“  играат актери на МНТ, но и студенти од ФДУ.  Покрај Коцев и Лошкова, во актерската екипа се и: Сенко Велинов, Дениз Абдула, Стефан Вујисиќ, Благој Веселинов, Борче Начев, Наталија Теодосиева, Ана Стојановска, Ивана Павлаковиќ, Славиша Кајевски, Исмет Шабановиќ, Дарко Ристовски, Томислав Давидовски, Ненад Анѓелковиќ, Виктор Бужаров, Филип Ивковски и Адриен Боирал.

Костимограф е Роза Трајческа-Ристовска, со која режисерката Витошевиќ има повеќегодишна соработка. Сценографијата е на Костантин Трпеноски, а композитор на музиката Огнен Анастасовски.

 

Mора да се научиме како да ги градиме политиките кои ќе водат кон осврт на сите теми важни за градење позитивен мир, но и реторички да останеме конзистентни на она за што се залагаме.

повеќе

Во изминатите 24 години откако Македонија и САД воспоставија официјални дипломатски односи, македонско-американските трговски врски растат бавно, но сигурно.

повеќе

Оваа појава почнува да претставува сериозна закана за учениците, но и грижа за родителите и наставниците.

повеќе