По извршената ревизија известени Финансиската полиција и ДКСК

Министерството за култура раскина договори вредни над еден милион евра

Министерството за култура денеска соопшти дека во периодот од 1 септември 2020 до 31 јануари годинава поради нереализирани проекти и неуредна финансиска документација ги раскина договорите во вкупен износ од 70.776.722 денари, односно над еден милион евра. Од Министерството за култура информираат дека е спроведена внатрешна ревизија и се известени Финансиската полиција и Државната комисија за спречување на корупцијата.

„Наодите од ревизијата, Министерството по службена должност ги испрати до Секторот за финансиска инспекција во јавниот сектор при Министерството за финансии, до Финансиската полиција и до Државната комисија за спречување на корупцијата, стои во соопштението.
Во согласност со усвоените заклучоци од вчерашната седница на Владата, Министерството за култура, како што се наведува, нема да ги исплаќа средствата кон другите корисници до завршување на финансиските контроли, а со цел заштита на буџетските средства.
„Сите информации ќе бидат познати по завршените контроли за што подетално треба да се произнесат органите кои се повикани. Очекуваме Финансиската полиција и ДКСК во најбрз можен рок да постапат заради расчистување на евентуални злоупотреби", се вели во соопштението од Министерство за култура.