Кинотека на Македонија

„Златен објектив“ за актерот Ангеловски и костимографката Тодорова Младеновиќ

На церемонијата што во среда ќе се одржи во просториите на Кинотеката на Македонија на актерот и режисер Коле Ангеловски и на костимографката Зорка Тодорова-Младеновиќ ќе им бидат врачени наградите „Златен објектив". На овој настан пригодните плакети и значките „Златен објектив" на лауреатите ќе им ги врачи директорот на Кинотека Владимир Ангелов, а слово за нивното дело ќе одржи филмологот Атанас Чупоски.

Никола Ангеловски – Коле е филмски, телевизиски и театарски актер и режисер, сценарист и драматург. Роден е во 1943 година, а првите актерски улоги ги има уште како дете, во детската радио-драма и детскиот куклен театар. Како филмски актер дебитира во 1962 година во филмот „Саша" на Раденко Остоиќ. Дипломирал актерство на Академијата за театар, филм, радио и телевизија во Белград, а од 1967 година до пензионирањето работи во Драмскиот театар во Скопје.

Добитник е на голем број награди за своите филмови и улоги – филмски и театарски – и покрај Петре Прличко и Илија Џувалековски, е еден од македонските актери кој остварил најголем број на улоги во југословенската и македонската кинематографија. „Битката на Неретва", „Жед", „Лито виловито", „Да се дојде и остане", „По Коњух планина", „Македонска крва свадба", „Оловна бригада", „Јужна патека", „Нели ти реков", „Собирен центар", „Црвениот коњ", „Храненик" се само неколку од многуте филмови во кои се појавува Ангеловски.
Во 1973 година го режира својот прв долгометражен игран филм „Татко (Колнати сме, Ирина)", според романот на Живко Чинго, со Велимир Бата Живоиновиќ, Неда Арнериќ и Мето Јовановски во главните улоги, а во 1988 и 2017 година филмските комедии „Викенд на мртовци" и „Ах љубов моја".

Зорка Тодорова-Младеновиќ е филмски и театарски костимограф, моден дизајнер и автор. Дипломирала на отсекот по сценографија и костимографија на Националната школа за декоративни уметности во Париз, Франција, во 1968 г., по што се вработува во Радио-телевизија Скопје како костимограф за тв-серии, драми и забавно-музички емисии. Истовремено работи костими и за играни филмови („Мементо", „Жед", „Истрел", „Исправи се Делфина", „Црвениот коњ", „Мемо, мојот татко", „Хај-фај", „Војната заврши" итн.), и за театрски претстави (во Драмски театар, Кумановски, Битолски театар, Театар на националности, Театар „Пралипе", итн.). Во 1977 г. специјализира изработка на костим на Школата на синдикалната комора за висока мода во Париз, и почнува поинтензивно да работи во македонската текстилна индустрија и конфекција. Подоцна предава Историја на облека и Модно креирање како доцент на ФЛУ и вонреден професор на ТМФ, каде што се пензионира.

Автор е на костимографски решенија за повеќе од 90 филмски, телевизиски и театарски проекти, како и на 200-тина историски костими за восочните фигури изложени во редовните поставки на Музејот на македонската борба за државност и самостојност и Археолошкиот музеј во Скопје.

По повод својот роденден на 29 април, Кинотеката секоја година го доделува „Златниот објектив" на филмски работници кои преку својот професионален ангажман придонеле за создавањето, развојот, промовирањето и популаризацијата на македонската кинематографија. За жал, заради пандемијата со КОВИД 19, манифестацијата „Златен објектив" пролетва беше одложена.

Досегашни добитници на ова признание беа режисерите Бранко Гапо, Трајче Попов и Кирил Ценевски, тонскиот снимател Глигор Паковски, аниматорот и карикатурист Дарко Марковиќ, директорите на фотографија Драган Салковски, Љубе Петковски и Благоја Дрнков, филмскиот работник Коста Крпач, продуцентот Панта Мижимаков, филмскиот критичар Илинденка Петрушева, монтажерот Димитар Грбевски и костимографот Елена Дончева.

При еден спор, понижувањето не е добро ниту за победникот, ниту за поразениот; ниту за „победникот“, ниту за „поразениот“.

повеќе

Стравот од неизвесноста што ја носи пандемијата од ковид-19 вирусот, бара да се преструктуираме и да го промениме начинот на нашето однесување и работење.

повеќе

Ако имаме предвид дека секој збор има свое значење, тогаш оваа „железна завеса" кон Бугарија, за која зборува премиерот дека била подигната од Југославија, се доведува во корелација со Берлинскиот ѕид. А, железната завеса помеѓу двете германии доведе до нивно обединување.

повеќе