„Приказни од петка“ - нова книга на Соња Гиздавиќ

Книгата „Приказни од петка“ на Соња Драгољуб Гиздавиќ ќе биде промовирана на 10 декември во култното место во Стара чаршија во Скопје во 19 чaсот. Родена е пред 74 години во Загреб, Гиздавиќ завршила основно и средно образование во Кочани, а Филозофски факултет, група Југословенска книжевност во Скопје. Сега, во слободно време, како пензионер, ја напиша својата петта книга, збирка раскази, не запоставувајќи ги и другите активности поврзани со изработката на уметнички накит и модно креирање во работилницата во нејзината семејна куќа во Кочани.

Соња Драгољуб Гиздавиќ е познато новинарско име, таа целиот свој работен век го помина во националната МРТ како новинар и уредник на програми и автор на бројни документарни емисии.

Гиздавиќ е авторка на четири книги поезија. „Приказни од петка“ е нејзино прво прозно искуство. Доне Донев ја напиша рецензијата за расказите (31 на број) кои потекнуваат од случки поврзани со автобусот „петка“, кој своето сообраќање низ Скопје го започнува од населбата „Ѓорче Петров“, каде живее авторката Соња Драгољуб Гиздавиќ и со кој се вози.

Промоторка на настанот ќе биде Солзица Поповска од Филолошкиот факултет при УКИМ. Дизајнот на корицата е на Николо де Золт-Коста.