ЦД „Лебедовата песна на заробеничката на ветрот“ радио – елегија за Даница Ручигај

Деновиве излезе најновото дело на новинарите на Македонското радио – Радио Скопје и познати македонски публицисти Искра Чоловиќ и Свето Стаменов – двојното аудио ЦД „Лебедовата песна на Заробеничката на ветрот” (радио - елегија за првата македонска поетеса Даница Ручигај), посветено на првата македонска поетеса и основоположничка на т.н. женско писмо во современата македонска поезија и литература воопшто Даница Ручигај, која загина во скопскиот катастрофален земјотрес во 1963 година.

Радио - елегијата „Лебедовата песна на Заробеничката на ветрот” има три структурални делови: авторски текст - коментар кон животот на поетесата и нејзиното време на човечко и творечко опстојување, избрани стихови од двете антологиски стихозбирки „Сребрени ноќни игри” и „Заробеници на ветрот” и автентични искажувања на петнаесетина нејзини современици, пријатели и следбеници: м-р Златица Поповиќ – Ручигај, Евгенија Шуплинова, Иван Чаповски, Михо Атанасовски, Гордана Михаилова – Бошнакоска, Коле Чашуле, Светлана Христова Јоциќ, Звонко Стојановиќ, Људмил Спасов, Кристина Николовска, Васил Тоциновски, Александар Прокопиев и Ирена Павлова де Одорико. Како таква оваа радио – елегија, всушност, е есенција на најважното, најскапоценото, но и најсетното од животописот, но и поетопис за најпоетесата меѓу македонските поетеси, раскошната и незаборавна Даница Ручигај, жената која сосема сама започна и сврте цела една страница во македонската поезија, оставајќи длабоки и неизбршливи траги не само во современата македонска поезија, туку и во македонската култура воопшто.

Даница Ручигај со својата исконска физичка и духовна убавина и со својот сензибилитет, некомформизам, творечка енергија и животна храброст, не помирувајќи се со патријархалните предрасуди и стереотипи за жената на овие наши македонски простори, пред повеќе од пет децении со своите стихозбирки „Сребрени ноќни игри” и „Заробеници на ветрот” ја подотвори вратата низ која достоинствено и со дигнитет ќе тргнат повеќе модерни, самосвесни и еманципирани жени на македонската поезија. Таа, македонската Силвија Плат, амазонката на македонската современа поезија, и најхрабрите по неа се изборија за рамноправно создавање на жената во најсуптилната сфера во уметноста - поезијата, дарувајќи ни возвишени плодови на поетското создавање, збогатувајќи ја комуникацијата меѓу двата пола и облагородувајќи го светот во нас и околу нас. Затоа, мораме да признаеме, сакале или не, дека во тоа време преполно со табуа, нејзината појава и творечка енергија преточена во стихови, претставува авангарда во вистинска смисла на зборот.

          Но, и покрај тоа, Даница и нејзините „Сребрени ноќни игри” и „Заробеници на ветрот” ја имаа таа проклета наша македонска судбина да бидат жртви на ненамерна или намерна заборавеност и на повеќедецениски целосен молк. Затоа,  радио – елегијата „Лебедовата песна на Заробеничката на ветрот” е уште еден обид на авторите, кои повеќе од две децении неуморно трагаат по животните и творечките врвици на Даница Ручигај, од првата македонска поетеса да биде симната копрената на заборавот и конечно да си го заземе местото што и припаѓа на македонското поетско небо.

          Инаку, Искра Чоловиќ и Свето Стаменов неодамна ја промовираа антологијата на песни посветени на првата македонска поетеса Даница Ручигај „Недореченост, о проклета да си“, што ја приредија по повод 55-годишнината од нејзината смрт, а заедно со м-р Надица Караколева беа автори на изложбата на факсимили на рачно напишани песни посветени на Даница Ручигај, која беше поставена во Младинскиот културен центар – Скопје од 6 до 15 септември 2018 година. Исто така, тие се автори и на книгите „Лебедовата песна на Заробеничката на ветрот“ (2016) и на „Ако влегуваш во овој храм во кој љубовта е вера, помоли се“ (2017), а беа приредувачи на книгата „Сребрени ноќни игри & Заробеници на ветрот“ на Даница Ручигај, која беше објавена во 2003 година по повод 40-годишнината од нејзината трагична смрт и од скопскиот катастрофален земјотрес и која, покрај двете нејзини антологиски стихозбирки, содржи се што дотогаш беше напишано и објавено за неа и за нејзиното творештво.  

Минатата недела, Сирија повторно беше на врвот на меѓународните вести. Земјата, која долги години е вклучена во борбата против екстремистичките групи, повторно се соочи со нов бран на агресија и воена акција. Во средата, на 9 октомври, турската армија, заедно со сириските антивладини бунтовници, го започна маршот кон североисточните делови на оваа земја што предизвика жестоки борби.

повеќе

Добар изборен систем треба да биде репрезентативен, но и да овозможува ефикасно владеење.

повеќе

Луѓето можете и ги задржите во сопствената земја - ако им е добро.

повеќе